နဂါးမယ်လေးရဲ့ ငရဲတံခါးကချစ်သူ (Part 2) (Myanmar Translation)

Book 28 Chapter 390

Uni

အခန်း (၃၉၀) မိုးကောင်းကင်အင်မော်တယ်များကိုလိုက်ဖမ်းခြင်း

ကျန်းလန်က တစ္ဆေတိုင်းပြည်နှင့် မိတ်ဆွေဖြစ်ထားသည့်အတွက် နာမ်လောကမှ တစ္ဆေစစ်သည်တော်များကို တစ်ကြိမ် ခေါ်ထုတ်ခွင့်ရှိသည်။

ဤအခွင့်အရေးကို တစ္ဆေတိုင်းပြည်မှ တိုင်းပြည်ကံကြမ္မာချီစွမ်းအားကိုယ်တိုင် ပေးအပ်ထားခြင်း ဖြစ်၏။ အသုံးမဝင်လှဟု သူ ထင်မှတ်ခဲ့သော်လည်း ယနေ့ အသုံးဝင်လာမည်ဟု တွေးမထားခဲ့ပေ။

ထို့ပြင် သူ့နောက်ကွယ်တွင် ရှိနေသူမှာ တစ္ဆေတိုင်းပြည်ဖြစ်သည်ဟု အချို့က တိုက်တိုက်ဆိုင်ဆိုင် ထင်မှတ်သွားကြပေမည်။ တစ္ဆေတိုင်းပြည်ကလည်း နတ်မိစ္ဆာများနှင့် ဆက်ဆံရေးကောင်းမွန်သည် မဟုတ်ပေ။

ထို့ကြောင့် နတ်မိစ္ဆာများကို ဆန့်ကျင်ရန် ဤနည်းလမ်းကို အသုံးပြုရသည်က မဆိုးလှပေ။

ပြီးတော့ ပုန်းကွယ်နေသည့် တန်ခိုးစွမ်းအားရှင်များ ရှိနေမည်ဆိုလျှင် ထွက်လာစေရန်အတွက် ကျန်းလန်က ပြဿနာရှာလိုက်ခြင်း ဖြစ်၏။

မိုးကောင်းကင်အင်မော်တယ်အထက် တန်ခိုးစွမ်းအားရှင် မရှိဘူးဆိုလျှင် သူက ရန်သူများကို တစ်ယောက်ချင်း သတ်ဖြတ်ပစ်မည် ဖြစ်သည်။

ရှိခဲ့မည်ဆိုလျှင်တော့ သူ ဤနေရာမှ ထွက်ခွာသွားပြီး ခွန်လွန်တောင်သို့ပြန်ကာ ဤအကြောင်းများကို ဆရာဖြစ်သူကို ပြောပြရပေမည်။ နာမ်လောကမှ တစ္ဆေစစ်သည်တော်များ ရောက်ရှိလာသည့်အကြောင်းကိုတော့ ရှင်းပြရန် အတော်လေး ခက်ခဲပေလိမ့်မည်။

သို့သော် သူ အခြားနည်းလမ်းတစ်ခု စဉ်းစားထား၏။

နာမ်လောကမှ တစ္ဆေစစ်သည်တော်များကို မခေါ်ယူမီ ကျန်းလန်က ဤနေရာ၏ ယေဘူယျ ဖွဲ့စည်းပုံနှင့် အရေးကြီးသည့်နေရာများကို ကြည့်ရှုအကဲခတ်လိုက်သည်။

သို့မှသာ တန်ခိုးစွမ်းအားရှင်များ ရှိ မရှိ ဆုံးဖြတ်နိုင်မည် ဖြစ်သည်။ တန်ခိုးစွမ်းအားမြင့်မားသူများက ဗဟိုဌာနများတွင် စခန်းချတတ်လေ့ ရှိသည်။