٢٢- ناصر يضايقها
- جنتل توكسيك مان
- نيرة شريف
اليوم التقيت بكِ
ربما محبوب أم مذموم. ♡
النجمة..
____________________________________
ذهبت هنا إلى الحارة التي تسكن بها ثم دقت الباب فسمعت صوت جدتها التي تحركت من الداخل من خلال الكرسي المتحرك الخاص بها وهي تقول:
مين؟
" افتحي أنا عمدة. "
قالتها هنا مازحة ففتحت جدتها ودخلت هنا وأوصدت الباب خلفها جيدًا ثم قالت:
مثاؤ.
ردت جدتها بضيق معاتبة:
اتأخرتي يا هنا.
" أنا مضايقة أوي يا تيتة والشغل جايب همه معايا وأنا غلطت النهارده لما سيبت الشغل لمجرد ابن صاحب الشغل ضايقني وكان عايز يفرد نفسه عليا، ياريتني كنت سكت وخلاص. "
" يا حبيبتي اتعلمي حقك متسكتيش عنه وكرامتك أهم من أي شيء ومش حتة شغلانة تضايقنا كده وبعدين أحسن دي كانت شغلانة مش راضية عنها، يعني أيه تفضلي شغالة ليل نهار وبالمرتب ده! "
" فاكرينا عبيد. "
قالتها بغيظ فقالت جدتها باهتمام:
طيب قومي غيري واستحمي وتعالي كُلي العشاء جاهز، أنتِ اتغذيتي؟
هزت رأسها نافية:
لا هو أنا لحقت ده الشغل كان نازل عليا ولا كأن في غيري وفي الأخر يطلعلي زعطوط يقولي أنا ابن صاحب الورشة، يلهوي على السماجة هو علشان ابنه بقى ياخد كارت سماح يعني؟؟
" لا ملوش الحق، متحرقيش دمك ويلا بس. "
" طيب. "
قالتها ثم توجهت للمرحاض لتغتسل وخرجت تأكل ثم قالت بهدوء:
كان في واحد من اللي واقفين عربيته عطلانة المهم يعني ابن صاحب الورشة كان عايز ياخد دوره فأنا اتخانقت وكده وبعدين لما خرجت جيه ورايا الراجل ده وعرفني عن نفسه يعني وقالي إنه ندمان إني خسرت شغلي بسببه وعايز يشغلني معاه وكده فأنا شبه وافقت يعني، وهو عنده ورشة كبيرة معروفة هنا في الإسكندرية والصراحة فرصة مش هتتعوض بس أنا مش عارفة ليه مش مطمنة يا تيتة للشخص نفسه حساه سيمب.
رمقتها جدتها باستنكار وقالت:
يعني إيه سيمب يا هنا؟
ضحكت هنا ثم قالت:
ده اللي لفت نظرك؟
" الكلام اللي قولتيه فوق حلو عرفيني بقى يعني إيه سيمب. "
هزت هنا رأسها بامتناع وقالت وهي متوجهة للمطبخ.:
الكلام ده مش جيلكم يا زيزي وسيمب دي حاجة حلوة أوي.
" سيمب سيمب، أنا مالي. "
قالتها زينات بعد أن تحركت بالكرسي ناحية المطبخ.
___________________________
بعد أن أتت تلك السيارة أقصد حبل النجاة لهما، وقفا سويًا أمامها يصيحان بقوة لهذا الرجل حتى يتوقف وبالفعل توقف وكانت السيارة يبدو أنها قديمة متهالكة وبداخلها رجل كبير السن يلبس نظارة ويدقق النظر فيهما!
أنت تقرأ
جنتل توكسيك مان
Romance" فرحات عبد الرحمن" شاب يعمل وكيل نيابة ويعاني من مرض اضطراب الشخصية المعادية للمجتمع مع ارتباط وثيق باضطراب النرجسية مما يجعله ينقاد نحو كل شيء معاكس للقوانين الحياتية بالإضافة إلى العمليات الإجرامية والقتل دون الشعور بالذنب، تزداد أعراض مرضه حينما...
