جنتل توكسيك مان

ما قبل النهاية.

السلام عليكم

أحب أعرفكم بنفسي علشان حاجة كده

حاليا الحمد لله ربنا كرمني بكلية طب الأسنان، اعتقد طبيعي جدا جدا أننا نستوعب حياة طالب أي كلية بتكون شغلاه إزاي وحياة طلاب الكليات الطبية والعلمية بالأخص بتكون إزاي، أنا من يوم السبت اللي فات يومي بيبدأ من الساعة ٧ ده الصحيان لغاية ٥ بعد العصر ده الرجوع

وطبعا المفروض برجع أشوف ورايا في إيه
سواء مذاكرة سواء البيت أو حتى أرجع ارتاح
أصلي معلش (مش عبدة) لحد ولا للكتابة اللي أنا مش عارفة أديها وقت كبير

الناس بتشتكي من حوار الفوت
بتشتكوا ليه يا حبايبي؟ هو مش حقي؟
وعلى فكرة الفصل حتى لو وصل ٢٠٠٠ فوت وأنا مش مخلصاه مش هنزل عادي، الفوت طريقة أضمن بيها التفاعل وده أقل حقوقي اللي المفروض زي ما بتقعدوا تثوروا عليا أثور بيها عليكم ولا إيه؟

وفي بنت بتقولي حوار الفوت ( ب'يض فشـ'خ ) في الكومنتس اللي فاتت، أنا أسفة وعارفة الكلام ده لا يليق إني أذكره
يعني بصراحة أنا قرفت من الكلام وللحظة قولت ليه حطيت نفسي في مكان اللي موجودين فيه فعلًا بيتعاملوا معايا بالطريقة دي؟

مين قال أني مجبرة اتحمل كلامكم
مين قال أن الالتزام فرض عليا؟
الاحترام مني ليكم ومنكم ليا فرض علينا سوا
ومش معنى إني بتأخر يبقى مش بحترمكم، اللي اتعامل معايا شاف احترامي وده كفاية.

بالنسبة للفئة اللي هتقول
أنتِ من قبل الكلية بتتأخري، هقولكم والله حتى لو بتأخر أنا منزلة ٩٤ فصل يسدوا عين الشمس خلال سنة واحدة، وأنا من شهر ٣ اللي فات بتعالج بسبب معدتي ولغاية يومنا هذا باخد أدوية والألم شغال عادي وأغلب الوقت تعبانة.

هتقولولي أنتِ بتبقى أونلاين ساعات، أصل بنشوفك أصل معرفش إيه،
ردي ببساطة أنا محدش يحاسبني، أنا مبكتبش فرض، أنا بكتب لو نفسيتي تمام والدنيا تمام عندي وقادرة والكتابة مش غصب يعني.

هتطلع فئة تاني في عقلها هتقول هي بتتكلم كده ليه
هقولكم ده ردا على أي حد قل أدبه عليا
كذا حد قل أدبه عليا وأنا سيبت ناس بمزاجي بس مش أنشغل كام يوم ألاقي الناس مستغلة ده
وأن مكانش حد غلط فيا بلفظ، ففي طرق كتير بتعبروا بيها عن الاستياء مني وأقربهم واحدة بقولها أنتِ بتضغطيني وكل شوية تكلميني بأسلوب مش لطيف وكان ردها هو فين ده بعدين أنتِ عايزة تعملي فيها البريئة وأنا الشريرة وتخلي القراء يشوفني وحشة؟

يا سلام والله يا سلام لكونش فرحات وأنا معرفش؟
اتقوا الله في كلامكم يا شباب، خليكم لطاف
خلي عندكم مشاعر وحطوا نفسكم مكاني
افتكروا أن ولا حد فيكم هيسيب مذاكرته أو هسيب بيته أو أي حاجة مهمة عنده علشان يقعد يكتب رواية يبسط بيها غيره.

وأنا عارفة السؤال اللي جيه حاليا في بالكم
طيب ونزلتي ليه يا نيرة طالما مش هتكملي للأخر بنظام؟

حبايبي دي مش محتاجة سؤال
طالما رواية مش كاملة متقرؤهاش
أفرض كاتبها وقفها ولا مسحها ولا حصله حاجة او اتوفى؟
هيبقى إيه الحل؟
الحل إننا منقرأش روايات مستمرة لو منقدرش ننتظر وبنبقى هنموت ونعرف

وأنا قولت كتير في الفيس الموضوع ده
اللي مش حابب حوار أني بتأخر يوقف الرواية
أنتم اللي بتحبوا جلد الذات وبترجعوا كل مرة تقرؤه أول ما بنزله، طب أنا مالي إذا كنت بنبه أني بتأخر؟

فنهاية القول
إن الرواية فاضلها حوالي ١٠ فصول وتخلص
أقدر أكتب عادي بس لو بقيتوا طبيبين معايا شوية
لإني شايفة إن حتى الفوت مستخسرينه فيا
فياريت تكونوا كويسين
الفصل نزل خير وبركة، اتأخر متقعدوش تتضايقوا على الفاضي، أنا بفتح الواتباد بالصدفة ممكن كل ٣ أيام ولا حاجة وبلاقيكم قاعدين تقطعوا في فروتي وإني كاتبة مش ملتزمة.. إلخ، فاهدوا شوية رجاء

وأي حد هيقل أدبه عادي جدا هعمله بلوك
علشان صدقوني ورايا محاضرات عايزة تتذاكر
وسكاشن وورق وحوارات أكبر مني.