٣٧- تعايره ويعايرها
- جنتل توكسيك مان
- نيرة شريف
قراءة ممتعة ومتنسوش النجمة. 🤎
الفصول هتبقى فيما بعد ٤٠٠٠ كلمة وهتنزل بس مش يوميًا زي ما كنا عاملين وهي هي نفس الحسبة علشان كان الفصل أقل بس أنا الأيام دي تعبانة نفسيًا ومحتاجة ارتاح.
____________________________________
بدأ انتشار خبر أن عمار وعنود يريدان الانفصال وأصبح خبرًا حصريًا لكل من في العائلة وعمار ليس على باله شيء فهو منهمك في عمله بداخل المصنع التابع لشركته، حتى جاء له اتصال باسم " الجماعة "، سرعان ما رد وقال:
حبيبة قلب عمار عاملة إيه؟
صدر له صوتها الباكي وهي تقول بضيق:
بابا وأزهر ومريم أخت فرحات وماما قاعدين بره يكلموني وحش أوي وقالولي إن العيب فيا وماما قعدت تقولي يبقى العيب مطلعش في فرحات أنتِ اللي مش بتعمرلك جوازة ولا حاجة وأنا عايزة أطلع اتخانق فيهم كلهم بجد.
" سيبك منهم، أنا مش عارف حاطة في نفسيتك ليه المهم إحنا عاملين إيه سوا مع بعض. "
بكت أكثر وقالت باعتراض:
لا يا عمار هما طريقتهم صعبة أنت مشوفتش بابا كان شوية وهيقوم يضربني بابا أول مرة يبقى متعصب عليا كده وأزهر اللي مبيدخلش في حياتي ومش موجود غير أخ بالاسم النهارده كان قاعد يعايرني بمريم مراته علشان مريم دي نسمة مبتغلطش وماما اللي مش بتطيقك بقت طايقاك لما عرفت إن فيها طلاق ده ناقص نجيب أهل فرحات علشان نكمل وصلة التقطيم فيا.
" عنود أنا قولتلك نستحمل معلش، أنتِ كل يوم هتسمعي كلام من ده بس ارمي ورا ودنك علشاني أنا على الأقل! "
ردت باختناق قائلة وهي تمسح دموعها:
طيب أنا عايزه أشوفك يا عمار مش قادرة أقعد في البيت مش طايقة حد كلهم طلعوا بيكرهوني.
ضحك على اعتقاداتها الساذجة وقال:
بيكرهوكي إيه بس دول أهلك، بعدين أنا شوية وهخلص شغل إيه رأيك نشوف شقتنا وبالليل بس تحضري معانا كتب كتاب هند وأنا هقف أرد لو حد بس ضايقك.
" أنت مش قولت هنختفي؟ "
قالتها باستفهام فرد قائلًا:
منار في الساحل ومش هترجع دلوقتي عايزين بس نكون موجودين النهارده علشان وجودنا هيكون مهم أسكّت اللي يضايقك حتى يا سيتي لو أخواتي والواد عمر الرخم اللي هيقعد يضايقنا ده.
" طيب بلاش نروح الشقة خلينا نحضر بس، وأنا هبقى أروح معاهم ولو قالولي حاجة هقولهم هند هي اللي عزمتني ومينفعش مروحش. "
" ماشي حلو ده، يلا بقى بلاش عياط مش متعود أنا وبقولك عندك فستان كحلي؟ "
" أيوه ليه؟ "
تساءلت بها مستفهمة فرد قائلًا:
" إحنا آه قدام الكل عاملين فيها هنتطلق بس لازم
الأوتفيتس بتاعتنا تبقى فوق مستوى التقييم، أنا هلبس بدلة كحلي فالبسي الفستان بنفس اللون والطرحة بيج ممكن وأنا الكرفتة هلبسها بيج هي والجذمة. "
أنت تقرأ
جنتل توكسيك مان
Romantik" فرحات عبد الرحمن" شاب يعمل وكيل نيابة ويعاني من مرض اضطراب الشخصية المعادية للمجتمع مع ارتباط وثيق باضطراب النرجسية مما يجعله ينقاد نحو كل شيء معاكس للقوانين الحياتية بالإضافة إلى العمليات الإجرامية والقتل دون الشعور بالذنب، تزداد أعراض مرضه حينما...
