جنتل توكسيك مان

اقتباس «خطة تخريب زواج»

متنسوس النجمة.

اقتباس «خطة تخريب زواج»
- جنتل توكسيك مان
- نيرة شريف
_________________________________________

-إزيك يا "منار" أخبارك إيه؟
قالها الطبيب "ناجي" الذي كان يجلس على كرسيه ينظر لها باهتمام فردت هي بابتسامة بسيطة:
الحمد لله يا دكتور.

"أخبار جوزك المريض إيه؟"
تعمد "ناجي" أن يتحدث عنه بهذه الطريقة الفظة، فانتبهت "منار" للطريقة التي تحدث بها وشعرت بالضيق نوعًا ما لكن سرعان أن ردت بعد أن أحسنت النية فيه وقالت:
أنا كنت جاية بخصوص "فرحات".

نظر لها باستغراب شديد وقال:
لسه عايزه تعالجيه؟

هزت رأسها وقالت:
أه، مسألة علاجه مهمة عندي، كل إنسان يستاهل ياخد فرصة في حياته، يتعالج فيها ويبقى إنسان طبيعي و"فرحات" شخص كويس، أنا شايفاه بيتغير.

- وليه متكونش دي ألاعيبه؟

نظرت في الغرفة بتشتت ثم قالت وهي تدافع بكل كيانها:
لا "فرحات" بيتغير، في فرق ما بين يكون شخص بيخدع حد وإنه حد يتعامل على طبيبعته كإنسان،  والدليل على كده أنه مش بيتعامل معايا على إنه ملاك، دايمًا بيضايقني بنرجسيته وأنه شايف نفسه فوق الكل بس بجد لما بنتعامل سوا بشوف قد إيه هو إنسان حنين، لما بيحب بيخلص، أكيد هيجي وقت وهتأذي عادي علشان ده الطبيعي بس هحاول إني أصبر عليه لغاية ما يتعالج.

ضحك وازدادت ضحكاته ثم قال باستنكار بعد أن مطَّ شفتيه:
إصرارك غريب يا "منار"، جوزك على الأقل لازم يتابع مع دكتور، ومستحيل يتغير طالما مش بيتابع ومفيش دوا بياخده مريض الاعتلال النفسي وبيخليه فجأة يبطل أفعال سيكوباتية، الأدوية اللي بتتاخد بتكون نواتج لأمراض تانية ظهرتله، أكيد جوزك بيعاني من الوحدة نتيجة إن شخصيته متتطاقش ومش حلوة وكله بيبعد عنه وده أكيد عمله اكتئاب، أه خلاه يعاني من مرض تاني فعلشان كده الدوا مهم في الحالة دي

ابتلعت ريقها ثم قالت بإحراج ودفاع:
هو شخصيته حلوة على فكرة، أنا بطيقه عادي، وكده ده معناه إن مفيش علاج؟؟

نفى وهو يهز رأسه ثم ابتسم وقال:
أنا مستعد أكتبله علاج بس قوي شويتين تلاتة، العلاج ده هيحسنه مع الوقت بس استحملي، هيتغير وهيتبدل حاله لغاية ما جسمه يتعود ومع الوقت كل ده هيقل.

بان على ملامحها التوتر لذا أكمل سريعًا وهو يقول:
متخافيش هيكون وضع مؤقت بس، ودورك الأدوية دي يشربها بأي طريقة.

هزت رأسها ثم قالت بتوجس:
طيب مش المفروض يتعالج بجلسات؟

- بصي كل حالة تختلف عن التانية وحالة جوزك ميؤوس منها فاللي هنقدر عليه هنعمله وبما إنه مش عايز يتعالج يبقى نعالجه غصب عنه.

تنهدت هي بحزن ونظر هو لها بتركيز ثم كتب لها نوعين من الأدوية، يعلم تمام العلم أنهم سيوصلانه لأسوء حالة نفسية، وسيعاني بفترات طويلة من الاكتئاب والانهيار العصبي كذلك سيعود عليه بالضرر في حالة اضطراب الشخصية المعادية للمجتمع الذي يعاني منها ولن يتحسن أبدًا، بل هو خطط لخراب زواجه بأسرع طريقة من نظره.

أخذت العلاج فقال لها:
من رأيي يا "منار" فكري تاني وشوفي مصلحتك، أنتِ مريضة وهو مريض زيك، مفيش حياة سوية تنفع بين اتنين مرضى نفسيين.

أزعجها مرة أخرى فقالت باقتناع:
الكلام ده صح علشان كده أنا كمان رجعت اتعالج و"فرحات" بدأ يعالج اللي عندي، فالأدوية والمهدئات اللي كنت باخدها والجلسات لوحدها مكفيتش، وجود راجل في حياتي يثبتلي أنه أحسن من والدي، ده بالنسبة ليا علاج.

رفع إحدى حاجبيه وقال بعدم تصديق:
يأما أنتِ بتكدبي يأما مش قادرة تستوعبي إن المريض اللي أنتِ متجوزاه مستحيل يعرف يعوضك هو نفسه عايز علاج!

وقفت وهي تتمسك بحقيبتها ثم قالت بابتسامة مرهقة:
معلش يا دكتور يمكن متكونش قادر تصدقني بس أنا مش هقدر أصدق كلام أي حد وهمشي ورا قلبي المرة دي حتى لو النهاية مش هترضيني، فاللي أنا حساه أصدق بكتير من أي كلام علمي هيتقالي عن مرضه ومعلش أرجوك اتكلم عنه باسمه علشان بضايق لما حضرتك بتقول عليه مريض، أنا عارفة إن ده عادي عند حضرتك بس ده جوزي.

- أسف يا "منار" مش قصدي أضايقك..

هزت رأسها بابتسامة مقتضبة وقالت:
عادي ولا يهمك.