جنتل توكسيك مان

77- بريء داخل عناقها

٧٧- بريء داخل عناقها
- نيرة شريف
- جنتل توكسيك مان

طبعًا أنا كعادتي بخلي ومقدرتش منزلش 🧸

متنسوش تتفاعلوا هنا كويس ياريت علشان ريتش الرواية لم يعد عاجبني.

ادعوا ربنا ينصرنا على الصهاينة. 💚
احتمال اللي بعده ينزل بسرعة لإنه فاضله شوية يعني.

_______________________________________

محضر ضبط وإحضار تلقاه كل من "عمار" و"قصي" وانتهى بوجودهما سويًا في القسم، دخلا سويًا وبدأ الضابط بإلقاء التهمة عليهما حين قال:
الشكاوي المتقدمة دي لو طلعت صح فأنتم متهمين في قضية غش تجاري يعني مش طالعين منها، هتجيبولي علان هتجيبولي ترتان برضو مش طالعين منها.

اعتدل "قصي" في جلسته وهو يتحدث بعنجهية قائلًا:
فهمنا على مهلك واعرف أنت بتكلم مين الأول.

- أنت بتهددني؟؟

تدخل "عمار" في الحديث قائلًا بنفاذ صبر:
أنت اهدى يا "قصي"، الحوار وما فيه إننا متأكدين إن البلاغات دي مش صح.

لوى الضابط فمه بسخرية لاذعة وهو يحرك يديه باستنكار قائلًا:
وأنت بقى هتكدبني أنا والناس اللي مقدمة بلاغات؟

رد "عمار" رافعًا حاجبيه قائلًا بصدق كعادته:
ببساطة تقدر تعرف إن الشحنة اللي بلغوا عنها دي شحنة استيراد يعني وصلت في الجمارك واتأكدنا إنها سليمة وأخدناها، فهو مش غش أكيد وواضح إنها بفعل فاعل.

حدقه الضابط بسخافة معتادة ثم قال وهو يمط شفتيه بعدم اقتناع:
ومن هنا لغاية لما نعرف موضوع الجمارك ونجيبه كله ونعرف القصة أنتم هتشرفونا هنا في القسم كام يوم لغاية ما تترحلوا على النيابة ويتم التحقيق هناك.

حرك "قصي" رأسه بشراسة وغضب قائلًا:
لا دي هبت منكم خالص، فين رئيس القسم اللي هنا، وخد بالك أنا أعرف اللي فوقك وفوق فوقك ومسنود جامد في البلد دي فلما أقولك هتندم يبقى هتندم.

ضحك الضابط بفم ملوي وهو ينظر لهما بتشفي ثم قال باستهزاء واضح:
يا عسكري تعالى خد البشوات نزلهم الحبس ويتعاملوا أحسن معاملة لأحسن هيأذوني في شغلي وأنا راجل غلبان بخاف.

- هخليك غلبان بجد بس صبرك عليا.
تفوه بها "قصي" فرد الضابط بتحذير قائلًا:
خد بالك أنا ممكن ألبسك تهمة التطاول على ظابط وحلني بقى لما تطلع منها وأنتم كده كده مش طالعين من غيرها.

ابتسم "عمار" بسخافة أخيرًا وفي هذا الوقت حالًا ثم قال بابتسامة شاسعة:
وعلى إيه يا باشتنا؟ مفيش تطاول ومفيش قلة أدب بس إحنا كده كده هنطلع مش علشان ورانا حد لكن المظلوم بينتصر وافتكر الكلمتين دول ومتحرقش في دمك يا "قصي".