منقذي من الهلاك

هلاك 32

اقاتل اشوقي  بصبري تجلداً

وقلبي في قيد الغرامِ مقيدُ..

~~~~~~~~~~~~~~~~~~~
__________________________

(لا تنسون التصويت ومتابعة حسابي وتعليقاتكم بين الفقرات احبكم )

مر شهر وصرت احسن من قبل صح مرات شوية احس بتعب بس احسن  .... واليوم امي مسوية حملة تنظيف بالبيت وابوية واخواني مو بالبيت... فگمت هنة يعزلن واني لازمة لفة مال چبن بيدي ومخلية السماعات بأذني واگفة على القنفة واغني  ...

ترف: خالة ويا خالة .. خالة شلون بية ما دريتي ما لومچ يا خالة شما حچيتي  ..

واگفة واهزز وامي تهز بيدها واسيل فاحطة ضحك .. لحد ما سمعت الباب امي صاحت..

ام ترف: امشششي اچة اخوچ افتحي الباب ..

نزلت من القنفة وطلعت اني وكفشتي وبجامتي وحدة مرفوعة وحدة نازلة ولفة بيدي وطلعت اغني واهزز چتف ...

ترف: شيصبرر العااشگ يا خاالة ..

ومن كل عقل واحد من اخوتي بالباب ..لحد ما فتحتها وهناا صدگ ردت الگاع تنشگ وتبلعني واني اشوف مهيع وأمة واخواتة بالباب .. ابتسمت بغباء وحكيت شعري وگتلهم ..

ترف : هلوو

موج ومطر فحطن ضحك علية ومهيع وجها صار احمر وهو حابس ضحكتة .. دخلن واخر واحد دخل مهيع قرب مني واني منزلة راسي بفشلة .. همس يم اذني

المهيع : هاا شيصبر العاشگ ههههه..

عض من لفتي وقبل لايدخل گرص زندي ودخل .. مسحت مكان الگرصة ورديت..

ترف: مو گرصة بشرر گصرت عگربة ..

خليت ودخلت من باب المطبخ واني ادگ على وجهي  باوعتلي اسيل وگالت ..

اسيل : يااا شبيچ ولچ ..

ترف: ولچ فشل فشل هيچ طلعت لاهل مهيع باللة هسة شيگولون علية ..

اباوع لاسيل غصت من الضحك ..

اسيل: هههه عززاا بعينچ امشي روحي غيري ملابسچ ودخلي سلمي ..

گعدت على الكرسي وگتلها..

ترف: ههي روحي بابة واللة ولا ادخل على ذيچ الفشلة ..

لزمتني من ايدي وتجر بية ..

اسيل: ولجچ گوومي فشلة  عليمن جاين هماا فضينيي..

اخذت نفس وزفرتة ورحت غيرت ملابسي لبست ثوب وعدلت شعري وخليت شوية مكياج ودخلت .. اباوع لموج ومطر  وهنة كابتات ضحكتهن خزرتهن ودخلت سلمت على عمتي عدل واجت عيني بعين مهيع غمزلي ..خزرتة وگعدت گبالة .. فترة ودخل علي سلم وگعد يم مهيع يسولفون بينهم ..

لحد ما حچت ام مهيع ...

ام المهيع : خية مثل ما شايفة خرزاية صارت زينة واني اليوم اجيت حتى انحدد موعد العرس بعد على شنو التأخير ..