ليس ذنبي

البارت (1)

#ليس_ذنبي
بقلم #احمد
البارت_1

السلام عليكم ورحمة الله وبركاته

وياكم گمر او مثل ما يسميني ابوي گمرنا عمري 17 سنة ربة بيت لان عايشة بمنطقة ريفية واهلي عندهم قانون ان المرة لبيتها مو لدراستها

مواصفاتي شعري طويل كلش بس دائما اقصو لان كثيف ويتعبني بالتمشيط وزني 50 طولي 159 بشرتي حنطية عكس كل اخواتي ولهذا بابا يسميني گمرنا

عيوني واسعات ولونهن عسلي غامق ويميل للسواد اكثر وعندي غمازات بخدودي مجرد ابتسم فورا يبينن وهن اكثر شي جميل بي

بابا انسان مزارع واكثر شي يحبو بهاي الدنيا احنا ومن بعدنا الارض الزراعية ودائما يكول عندي راحتين راحة بكعدتي بينكم وراحة بكعدتي بالبستان

خواتي 2 وحدة متزوجة ابن خالي والثانية متزوجة ابن عمي واخواني 3 ثنين متزوجين وعازلين ببيت لحالهم بس بنفس الحوش مال بيتنا

بيتنا الو حوش جبير كلش فاخواني عزلو بنفس الحوش علمود يكونون قريبين مننا ما يبعدون وهذا جان طلب امي الي ما تحب احد مننا يبتعد

اخواني الكبار رائد وزيد متوظفين بالمدينة القريبة ويروحون يوميا يداومون ويرجعون ويا اصدقائهم الي يداومون بنفس المدينة

الاخير سعد هسا مخلص دراسة وبعد ما توظف خواتي راح يكون الحديث عنهن مختصر لان اخذوهن ازواجهن وهاجرو للسويد وما الهن اي تأثير بحياتي

ابوي اسمو جاسم عمرو 55 سنة والو هيبة وكل الناس تحترمو لان طيب وماما اسمها هدى عمرها 50 وهم طيبة وكل الناس يحبوها

ومن اكول طيبين مو مديح الهم لانهم ابوي وامي لا والله بس من خلال القصة راح تعرفون ليش طيبين والناس تحبهم

اخوي رائد عمرو 30 زوجتو هبة عمرها 28 واولادهم عادل 4 سنوات وزهرة 3 سنوات  وزيد عمرو 27 وزوجتو ريام 26 وعندو نور ومحمد توم وعمرهم 3 سنوات

واخوي الاخير الي اصغر اخواني سعد عمرو 22 سنة وفد ملعب وصاحب لسان بس من يكعد بتعليلة نبقى نضحك على سوالفو لحد ما نشبع

جان عندي بنت عمي اسمها لانة من جانت صغيرة راحو للمدينة هي واهلها علمود يتسوكون وصار عليهم حادث وبقت بس هي وعايشة يمنا

جانو ماما وبابا حاسبيها وحدة من بناتهم ومستعدين يقصرون وياي اني وخواتي ولا يقصرون وياها واني واخواني نحبها حب مو طبيعي

واذا احد يسأل ليش ما تزوجها واحد من اخواني فالسبب انو صغيرة عمرها 16 واخواني معتبرينها اختهم لان صارلها 15 سنة عايشة ويانا على انها اختنا

ورغم عايشين بريف واهل الريف محافظين بس بابا جان اغلب المرات ياخذنا اني ولانة وياه من يروح للبستان علمود نجيب ويا خضرة للبيت