#ليس_ذنبي
بقلم #احمد
البارت_4
گمر .. مرن اليومين وجنا كلش متشوقين للعيد وكأنو طفلة واريد يجي العيد علمود اروح اجمع حلويات ويا الجهال ههههههههه
قبل العيد بيوم جنا مكملين كلشي العصر عجنت حنة وحطيت وياها جاي لان يكولون الجاي يسوي صبغتها اقوى وتبقى مدة اطول
بالليل اجن الجناين ومن خلصت التعليلة وحدة حطت للثانية حنة وبقيت اني اخير شي وحطتلي ماما حنة وهي لان جبيرة ما تحط
وبعد ما نحط حنة بايدينا نلفهن بقماشة ونشد عليهن خيط من عند المعصم علمود ما توكع وصلة القماش وبعدها نمنا وماما هي غطتنا
من كعدنا الصبح جانت الحنة ناشفة كعدنا على صلاة الفجر جانت ماما مجهزة بريج ماي حار بالمطبخ ووياه حوض علمود نغسل بيها لان بابا دا يسبح بالحمام
غسلنا ايدينا وجان لون الحنة يخبل مع بشرة ايدينا البيضة وجانن ايديني من النوع الي يكونن صغيرات كلش فجنت اباوع عليهن واضحك كأنهن ايدين جاهلة
بعدها ساعدنا ماما بتجهيز الحلويات للجهال قبل ما يجون وبابا وسعد سبحو وراحو لصلاة العيد ودخلت اني بعدهم سبحت ورحت للغرفة امشط شعري
جنت دا امشط واشتغلت مكبرات الجامع واجى الصوت مال التكبيرات رغم الدنيا باردة لان بعدو الجو ربيع وهسا طالعة من الحمام بس تحملت البرد
جنت احس نفسي طايرة ويا التكبيرات كلش احب من اسمعهن لان يمجدن الهي الي هو الله الواحد الاحد ولفت انتباهي صوت واحد
جان يكول الله اكبر 3 مرات لا اله الا الله الله اكبر الله اكبر ولله الحمد الله اكبر كبيرا والحمدلله كثيرا وسبحان الله بكرة واصيلا نفذ وعده ونصر عبده واعز جنده وهزم الاحزاب وحده لا اله الا الله ولا نعبد الله اياه مخلصين له الدين ولو كره الكافرون
رغم طويلة بس من اول مرة سمعتها انطبعت ببالي وتمنيت كلهم يسكتون ويبقى بس هو يردد بهاي الكلمات الي من صدك لا تقدر بثمن
بوقتها ماعرف التيلفون وجنت اتمنى ابقى اسمع هاي الكلمات ليل ونهار بس للاسف ماكو طريقة وبعدها اختفى صوتو ماعرف وين راح
رجعت امشط شعري واردد بالتكبيرات واني مستمتعة وتذكرت ماما فاستعجلت وكملت بسرعة ولبست ملابس العيد وحطيت كحل وحمرة ورجعت للمطبخ
جانت لانة بالمطبخ وماما دا تمشطلها شعرها وكعدت اني يمهن عالصوبة وصوت التكبيرات واصل يمنا وننتظر الجهال يجون علمود نوزعلهم حلويات
جانت اكو شغلة مو حلوة بنسوان القرية والي هي زيارة القبور بكل يوم عيد ورغم حرام وبالاخص بالعيد بس جانو الناس غشمة وبعضهم ما يقتنعون
جانن كل وحدة تاخذ وياها علاكة حلويات ويروحن يكعدن عند القبور ويروحون الجهال ياخذون منهن حلويات بعدين يرجعون يفترون بالقرية
أنت تقرأ
ليس ذنبي
Romansaاحببت ما لم ارى وتمنيت العيش في ما بُني من الثرى فلا حلمٌ يفارقني ولا واقع يساعدني فتاة بريئة تعصف بها الحياة بسبب حسنة اُحتسبت ذنباً ارتكبته عمداً فهل سيبقى ذنباً ام تسطع عليه شمس الحقيقة كل هذا واكثر في رواية #ليس_ذنبي بقلم #احمد كونوا مع...
