ليس ذنبي

البارت (73) الجزء الثاني

#ليس_ذنبي
بقلم #احمد
البارت_73 الجزء الثاني

ملاك.. من صارت الدنيا ليل رحت لياقوت لكيتها نايمة وفجأة سمعت صوت اوس خارج البيت يحجي على واحد ومبين كلش عصبي وصوتو عالي ورجعت بسرعة اشوف شكو

شلون وصلت يم باب الصالة الخارجي شفتو ضرب ذيب بوكس كل قوتو لدرجة وكعو بالكاع وذيب انصدم صدمة عمرو من ضربو اوس

اني صرخت من الخوف وصار بينهم قيس واجو العيلة كلهم والشيخ دخلهم داخل وهو يحجي عليهم ويرزل بيهم اخذهم عالصالة كال احجو شكو

اوس.. اسمع ابنك الزمال شمسوي

عيدان.. شكو ذيب

ذيب.. ماكو شي ينحجي

اوس.. احجي لا ادوس بحلكك

ذيب.. لا رد

قيس.. شبيكم لخاطر ربكم كلها صياح بصياح ما تعرفون تتفاهمون بهدوء

عيدان.. فهموني شنو الموضوع

ذيب.. يابة ماكو لا موضوع ولا شي غلطت بحق اوس هذا كل ما بالامر

اوس.. ولك فوكها تجذب .. جان يريد يضرب ذيب ومسكو قيس وذيب بقى ساكت ما حجى شي

عيدان.. اوووووس شنو اني طرطور كدامكم

اوس.. يابة هذا ابنك الناقص حاط عينو على ياقوت واليوم من احتركت ايدها بسببو

عيدان.. عيد عيد شنو كلت

اوس.. سمعتني كلش زين

ملاك.. كام الشيخ على حيلو وهو عصبي وعيونو حمر من العصبية تقدم على ذيب ومسك وجهو رفعو جان ذيب يباوع عالكاع ما يحجي

كال مع الاسف والله عبالي براسك خير وتصون الامانة بس خيبت ظني وضيعت تعبي وتربيتي جان ذيب يريد يحجي وضربو راشدي كل قوتو

اني ودعاء جان كاتلنا الخوف ذيب ما تزحزح من مكانو بس وجهو اندار بسبب الراشدي باوع على اوس ونظراتو توضح خيبة الامل الي حصلها من اوس

كال لاوس جزاك الله خير يخوي الي ردتك عون من حطيت عينك على ملاك وقررت تتزوجها كلنا ايدنا قرارك هسا اني صرت الناقص لان ردت البنية بالحلال

اندار وقبل ما يطلع باوع للشيخة الي ما تعرف شتحجي لو شتسوي وبعدها طلع وقيس صار يلوم بابوه واوس لان ما تفاهمو معو بطريقة ثانية

عبالنا يريد يطلع بالحوش لو للمضيف بس سمعنا صوت السيارة العالي وعرفنا انو طلع بالسيارة وكعد الشيخ بمكانو وبعدو عصبي وماعرف بشنو يفكر

جانت الخيارات كدامو قليلة لا يكدر يوافق على طلب ذيب ولا يكدر يرجعها لاهلها والمصيبة انو هي تعرف لان حسب كلام اوس واصللها حجي

عفتهم ورجعت للغرفة مالتها جانت مغطية راسها وتبجي كعدت يمها ورفعت الغطى عنها كلتلها كومي تعدلي اريد احجي وياج وكامت وهي خايفة