ليس ذنبي

البارت (16) الجزء الثاني

#ليس_ذنبي
بقلم #احمد
البارت_16 الجزء الثاني

عيدان .. الحجي الي كالو حسان كذب قبل اسبوعين تقريبا جان موجود هو وابن خالو اسمو اياد وجان عارض مرتو لابن خالو علمود يغتصبها

جانت الدنيا فجر ووصلنا خبر ان اكو سيارة بكاعنا وراحو ابنائي اوس وقيس  ولحكوهم على اخر لحظة

القاضي .. وين ابنائك

عيدان .. اوس موجود خارج وقيس بالبيت

القاضي .. يا ابني دخل اوس عيدان

ملاك .. طلع الشاب الي واكف عالباب وصاح باسم اوس ودخل اوس بس جان مبين على وجهو ملامح الاستغراب لان ما توقع يصيحوه

حجالو الضابط كلام ابوه كالو اوس اشهد واني اعرف معلومات اياد ومعلومات السيارة وكل الادلة موجودة يمي بس ما جبتهن وياي لان ما توقعت ينفتح هالموضوع

القاضي .. حسان عندك شي تحجيه لو ننطق بالقرار

حسان .. لا سيدي ماعندي

ملاك .. جان القاضي يقصد اذا عندو اعتراض على كلام اوس وابوه بس يدري بنفسو اذا اعترض راح تظهر الادلة كلها ضدو ويتورط بعد اكثر

صار ينطق القاضي بقرار الطلاق وويا كل حرف احس تنفتحلي ابواب الحياة السعيدة وجانت فرحتي من صدك لا توصف بخلاصي منو

بعدها سألني القاضي اذا اريد اقدم شكوى عليه هو واياد علمود موضوع الاغتصاب ورغم حقي بس ما جنت اريد اتصرف من عندي

باوعت على اوس واشرلي بعيونو ب اي وكلت للقاضي اي اريد اقدم شكوى عليه واخذوه الشرطة لحد ما يجيبون اياد ويحققون وياهم وبعدها يحاكموهم

طلعت من القاعة وجهي يفسر كمية الفرح الي عايشة بيها ولان ما لبست الخمار من شافتني الشيخة صارت تضحك وحضنتني وتباركلي

تخيلو وحدة يباركولها الغربة لان تطلق من زوجها من صدك هالحياة غريبة وبيها اشياء بعد اغرب بس واحد مثل حسان خسارتو غنى مو بس ربح

من صعدنا بالسيارة الشيخ كال بوية لازم هسا تلزمين عدة ولان بيتنا موجودين الولد ما راح تاخذين راحتج ومو معقولة نحبسج 3 شهور بغرفتج

راح ناخذج عند ام علاء مرة من كرايبنا عايشة لحالها بالبيت تبقين يمها واي شي تحتاجيه يوصل لعندج ومن تخلصين العدة مالتج ترجعين يمنا كلتلو براحتك

جانت فرحتي بالطلاق مغطية على كلشي لا فكرت بانو افترق عن سمر ودعاء ولا فكرت منو هاي وشلون اعيش يمها ووين عايشة وليش وحيدة

كل الي جنت افكر بيه هو انو حبل الوصل الي بيني وبين حسان واسمو زواج خلص انقطع ومن اليوم اني بطريق وهو بطريق وكل واحد حر بحياتو

من وصلنا البيت رحت بسرعة للمطبخ ابشر سمر ودعاء وحضنني وصارن يضحكن وفرحانات اكثر مني وسمر كالت والله تستاهلين هلهولة