ليس ذنبي

البارت (11) الجزء الثاني

#ليس_ذنبي
بقلم #احمد
البارت_11 الجزء الثاني

ملاك .. ووكف وضربني بالحزام كل قوتو على صدري فتحت عيوني على وسعهن وصرخت بصوت احسو جرح حلكي بس للاسف جان مكتوم ومحد سمعو

ورجع ضربني على بطني طلع روحي وبقى يضرب بي الى ان فقدت الوعي وماعرف شصار بعدها

كعدت اسمع اصوات خارج الغرفة وجان صوت حسان كلش عالي ويصيح عليهم ماعرف ليش جان الوجع الي احس بيه ياكلني اكل

شوية وفتح الباب ودخل وطبكو كل قوتو وشفت بايدو مسدس وصارو اهلو يدكون الباب وهو مو مهتم من شافني كاعدة تقرب علي ودفرني ببطني

كال كلو منج يا حيوانة ما يكون اسمي حسان اذا ما حركت عشيرتج بوية من ضربني احسو زرف بطني من الوجع بعدها عافني ورجع كعد عالسرير

وبقيت اني متمددة عالكاع وايديني وحلكي مربوطات وجسمي عبارة عن خطوط زركة وحمرة ووجهي منتفخ من الراشديات وكوة فاتحة عيوني

سامعين من واحد يكول افعالي فتحت للشيطان باب اني بدون اي افعال انفتح للشيطان ابواب وجان هذا الشيطان عبارة عن انسان اسمو حسان

قبل ما ينام اجى فتح ايديني وحلكي وكال اذا بس فتحتي الباب مال الغرفة الا اهجم بيتج وبيت الخلفوج وديري بالج تبقين بالحمام ترا اكسر الباب واكسر راسج وياه

بعدها عافني ورجع للفراش بقيت بمكاني ماكدر اكوم بس سحبت الغطى سترت جسمي بيه وبقيت بمكاني للصبح من كعد هو نزل تحت وقفل الغرفة

حاولت اسند نفسي علمود اكوم وجان جسمي يوجعني وجع قاتل وصرت ابجي وبس اريد اكوم ماكدر من الوجع مو كادرة اتحملو ورجعت وكعت عالكاع

جنت مرة اسند نفسي ومرة امسح دموعي وبالف يا ويلاه لحد ماكمت مشيت بخطوات ثقيلة كلش باتجاه الكنتور اخذت ملابس ودخلت للحمام

جنت مصممة عالانتحار قبل ما يجي بس ما انطاني فرصة اول ما دخلت للحمام دخل هو للغرفة وكال الج 10 دقايق اذا ما طلعتي من الحمام تعرفين شسوي بيج

جنت من صدك ما بي حيل اتحمل عذاب اكثر من هذا ومن نزل الماي على مكان الضرب روحي شاغت حطيت ايدي على حلكي وكتمت صوتي كل قوتي

جنت خايفة يطلع صوتي ويجي حسان عبالو انتحرت ويكسر الباب وبقيت واكفة لحد ما شوية هدا الوجع بعدها لبست ملابسي وطلعت

جان جايب وياه صينية ريوك على اساس مهتم بي هو عفتو ورحت على فراشي الي بيه اثار الدم بسببو جنت كوة اسحل نفسي سحل من امشي

اول ما وصلت عالفراش جان هو كاعد عالسرير واستغفر الله دفع الاكل برجلو ولا كأنو اكو احترام للنعمة وكال تسممي بسرعة انداريت عنو وما حجيت

كال بصوت عالي تسممي بسرعة ترا مالي خلكج وعلمود لا يأذيني اكلت وكل ما اريد اخلص يكلي الحزام مشتاقلج ومن الخوف اكمل الى ان من صدك شبعت