ليس ذنبي

البارت (38) الجزء الثاني

#ليس_ذنبي
بقلم #احمد
البارت_38 الحزء الثاني

ملاك .. مر كم يوم وجنا اني وسمر بغرفتي دا نحجي وجان الوقت متأخر كلش والي بالبيت كلهم نايمين واني وسمر اخذنا الواهس وبقينا نحجي

بعدها نعسنا وكامت سمر تريد تروح لغرفتها وطلعت وياها علمود نشرب ماي ونرجع سوا واول ما طلعنا شفنا ليان جانت طالعة من غرفة اوس ودا تضحك ومن شافتنا انصدمت

من شفتها مو بس كرهتها كرهت اوس وكرهتها وكرهت نفسي وكرهت كلشي بذيج اللحضة من صدك حسيت نفسي ضايعة بوسط حياة كلشي بيها مكروه

سمر انصدمت مثلي من شافتها كلشي جنا متوقعين بس ابد ما توقعنا اوس الي الناس كلها تشهدلو بالاخلاق والاحترام تطلع ليان من غرفتو بهالوقت

يعني خان الامانة وفوك هاي ببيت ابوه وانكشف كدام اختو يعني 3 مصايب وحدة اكبر من الثانية باوعت سمر على ليان بعصبية وكالتلها انكلعي عالغرفة

حجت بطريقة حتى اني خفت منها وليان راحت تركض للغرفة وراحت سمر جابت المكشة ورجعت على غرفة اوس وماعرف ليش رحت وياها

جنت اريد اعرف شنو صاير دخلنا للغرفة اوس نايم ورغم احترام سمر لاوس ماكو منو بس هالمرة ما بقى احترام وضربتو بالمكشة كل قوتها

ومع الضربة صاحت بكل صوتها اكعد يا حيوان وهو فز فزة مو طبيعية بحيث خلال جزء من الثانية وكف على رجليه وما حس الا الضربات تنهال عليه من سمر

يريد بس يفهم شكو وهي مستمرة تضرب بيه وتحجي عليه تكلو ما استحيت تسوي هيج كدامنا ما فكرت انو نشوفك يا خسيس يا كلب

ولك تنكس بيت ابوك الي طول عمرو طاهر يا نكس سحب المكشة منها بكل قوة وركعها بالمراية وصاح بيها بكل صوتو شبييييج انجنيتي

دفعتو كل قوتها وكالت ما يكون اسمي سمر بنت الشيخ عيدان اذا تبات اليوم بالبيت الي نكستو وعافتو وطلعت وهو يصيح عليها يريد يفهم شكو

باوع علي جانت دموعي تجري عالحسرة الي بكلبي كال شكو شنو صاييييير ترا راح اتخبل كلتلو مع الاسف عليك يا اوس توقعتها من الكل بس مو منك

عفتو ولحكت سمر جان صوتها طالع من غرفة ابوها دا تحجي وياه وبقيت اني كدام الدرج واجى هو يركض يريد يعرف شنو صاير

طلع الشيخ من غرفتو عصبي كلش وعيونو بكصتو وشاف اوس كدامو اول ما وصل يمو ضربو راشدي كل قوتو بحيث حتى اني فزيت من قوة الصوت

بقى اوس مصدوم وباوع عالدرج جانو واكفين دعاء وقيس لان كعدو عالصوت واني صايرة وراه مسكو ابوه من بلوزتو كال ولك ما تستحي على دمك

طول عمري محافظ على كل واحد داخل هالبيت اكثر من نفسي وتجي انت الي مخلي اعتمادي عليك تلعب على بنت الناس ببيتي ولك شكول لاهلها