#ليس_ذنبي
بقلم #احمد
البارت_46 الجزء الثاني
ملاك .. بعدها راحو وخالتي كالت الله يريحهم مثل ما ريحونا جنت شايلة هم للنيشان كالت ام علاء بالعكس والله جان تونسنا بيه حتى لو خبصة
مرن كم يوم جاتت الاتصالات بينا احنا واهل اوس متواصلة علمود التحظيرات وكان كلشي كامل على اتم وجه واوس كمل الغرفة
قررنا يكون العرس يوم الاثنين فيوم السبت العصر اجى قيس اخذ جنط الملابس والجهاز الي اشتريتو بس بقى يمي فساتين الحفلات وفستان العرس
ويوم الاحد الظهر اجى ذيب اخذنا اني وخالتي للصالون وقيس اخذ خواتو ودعاء لغير صالون وماعرف شنو السبب بس لو ويانا جان تونسنا ويا بعض
جانت ام الصالون عدها عاروس كدامي وحجزنا يمها لثاني يوم علمود ما اتأخر ومن خلصت العاروس بلشت بي واول شي جان تسريحة الشعر
شعري جان طويل كلش فقصت منو شوية علمود يصير عدل من تحت وصبغت اطرافو ابيض ثلجي والباقي عافتو على لونو وطلع كلش حلو
بعدها شالتو كلو ونزلتلي خصلات على خدودي وطلعت التسريحة تخبل والمكياج لان حفلة نيشان وحنة حطتلي مكياج خفيف
قبل المغرب صرت جاهزة باوعت على نفسي بالمراية جنت حلوة بس احس ماكو تغيير هواي بشكلي وهالشي عجبني ما اريد المكياج يغطي شكلي الحقيقي
جان المكياج رغم انو خفيف بس نازك وكلش حلو وخالتي صارت تسمي بالله وتقرا المعوذات وام الصالون تباركلي وتدعيلي بالتوفيق
بعدها خالتي خابرت ذيب وبين ما اجى صورتني بتيلفونها هواي صور ومن اجى ذيب لفتني بالعباية وركينا وياه وصلنا للبيت وراح
دخلت داخل البيت لكيت ام علاء وبنات اخوانها وخواتها مسويات الكوشة ومرتباتها وشكلها كلش حلو واني اصلا جنت ناسيتها بالبداية
كعدت عالكرسي وخالتي كلش تشكرتهن لان جهزن الكوشة ولان ورانا حفلة ما جانن مسويات عشى بس منظفات البيت ومتجهزات للحفلة وجايبات مسجل
جان بذيج اللحظات وضعي طبيعي رغم تفكيري بالحفلة بس لان بعدها ما بلشت ما جنت متوترة هواي وورا صلاة العشاء بشوية اجو
من دخلت السيارات بالحوش ويا صوت الاغاني على كولتهم وكع الفاس بالراس وهنا بلش يصعد التوتر واحس جسمي بدا يرجف شوية شوية
جان اصعب شي هو انو لابسة فستان بدون شال واني متعودة البس شال وعباية كدام اوس واهلو ولحد ما تقبلت موضوع الزواج بصورة كاملة
دخلن البنات وبلشت الهلاهل تركع يمين ويسار واني منزلة راسي وافرك ايديني من التوتر وهاي بعد اوس ما جابو طاريه اذا دخل شلون بي
صار اطلاق نار خارج وفزيت بس فزة خفيفة محد انتبه الها واجن البنات يباركلي جانن جايات هواي نسوان وبنات من عمامهم وكرايبهم
أنت تقرأ
ليس ذنبي
عاطفيةاحببت ما لم ارى وتمنيت العيش في ما بُني من الثرى فلا حلمٌ يفارقني ولا واقع يساعدني فتاة بريئة تعصف بها الحياة بسبب حسنة اُحتسبت ذنباً ارتكبته عمداً فهل سيبقى ذنباً ام تسطع عليه شمس الحقيقة كل هذا واكثر في رواية #ليس_ذنبي بقلم #احمد كونوا مع...
