ليس ذنبي

البارت (39) الجزء الثاني

#ليس_ذنبي
بقلم #احمد
البارت_39 الجزء الثاني

اوس .. كلتلو يابة احلفك بالله لا تكلي هذا الدم منها كلي من اي احد بس مو منها نزل راسو وهو مهموم وكال قيس ابقى عند اخوك وعافنا وراح يمشي

انداريت اريد احجي ويا قيس وانفتح باب الغرفة وطلع الممرض يركض اريد اسألو ما لحكت لان جان كلش مستعجل وما كدرت اتحمل اكثر

فتحت الباب جانو متكومين الدكاترة حولها بحيث مدا اكدر اشوفها من كثرهم وشافني واحد من الممرضين واجى يريد يطلعني وما كدر

بس سحبوني قيس وعلي وطلعوني من الغرفة بس بوقتها من الصدمة بقيت ساكت ماعرف شحجي احس لساني انربط من شفتهم هيج حولها

شوية ورجع الممرض يركض ووياه 4 بطالت دم (علب -اكياس) ودخل فورا للغرفة كعدت عالكرسي وحطيت راسي على ايديني وماعرف شسوي

كلت هاي هي راحت مني خلص كل هذا بسببي كلشي صار وياها بسببي من حبيتها دمرتها ما ارتاحت لو يوم واحد

كال علي توكل بالله اوس انت ما دخلك مسكتو من ياخة دشداشتو كلتلو بعصبية دا اكلك انييييي السببب فاهممممم من اكول اني يعني انييييي

مسك ايديني كال اهدئ وعوفني كلتلو لعد انجب ولا تسمعني صوتك اول ما كملت كلامي ضربني بوكس على وجهي وكال ارجع لوعيك قبل لا اكمل عليك

صار قيس بيناتنا كال شبيكم تخبلتو انتو البنية بين الحياة والموت وانتو ملتهين تتعاركون رجعت كعدت بمكاني وما اهتميت لضربة علي

جانو كل شوية يطلعون الممرضين من الغرفة ويرجعون ومن نسألهم يكولون بعدها تحت العملية الدقايق تمر والساعات واحنا ننتظر على نار

ابوي جان كل شوية يجي يسألنا ويروح يفتر قريب من المستشفى لان مو كادر يبقى ينتظر بالمستشفى تخيلو واحنا بهاي الحالة انتظرنا 5 ساعات

من طلع الدكتور ركضنا عليه كال سوينا الي علينا بس اول ما تكعد ماراح تتذكر حياتها الحالية ممكن تنسى 80-90% من ذاكرتها حسب الضروف

الخبر الحلو هو انو ترجع ذاكرتها والخبر السيئ اذا رجعت ذاكرتها بشكل مفاجأة ممكن تدخل بغيبوبة لا تقل عن 10 سنين فادعولها

باوعت على قيس كلتلو هسا افرح لو احزن بقى ساكت ما يعرف شنو يجاوب شوية وطلعوها من غرفة العمليات وجهها ذبلان وصاير اصفر

علي صار بصفحة علمود ما يشوفها واني لحكتها مثل الطفل من يلحك امو وبذيج اللحظات جان خوفي عليها ما ينوصف دخلوها لغرفة العناية وسكرو الباب عليها 

خلي احجيلكم الي صار وياها

طبعا مثل ما تعرفون من زتيت القنفة على الدرج انكسر السياج واكو بعض حديدات بيه بقن بمكانهن بس انطعجن وجانن حادات كلش