#ليس_ذنبي
بقلم #احمد
البارت_3
گمر .. جانت روحة البستان من احلى الاشياء الي نسويها لان اجواء البستان كلش حلوة والماي مال البير كلش حلو من احط رجليني بيه واحس ببرودتو
بس بطريق الرجعة نضوج لان الجو يكون حار ما نوصل الا احنا كاتلنا الحر والشمس بس مع هذا مستعدات نروح للبستان يوميا شكد ما نتونس بيه
مرت الايام بروتين طبيعي ماكان اكو شي مهم ينذكر حياتنا بقت مثل ما هي الصواصي كبرن وصارن يبيضن واكو غير دجاجات هم كعدن عالبيض وفقسن
يعني التفاصيل الي ذكرتها من قبل نفسهن بدينا نستعد للشتاء جنا نروح اني ولانة وسعد وماما على البساتين الي زارعين بيهن حب شمس
جانو ياخذون القرص الي بيه الحب ويعوفون الساق مال النبتة لحد يا يبس بمكانو فجنا نروح نجمعهن وناخذهن علمود التنور
جانو اهل البساتين ما يمنعونا بس المشكلة ان البساتين جانت بعيدة وصعبة علينا ننقل الحطب من البساتين للبيت فجنا نجمعو ونخليه على صفحة
ونبقى كم يوم نجمع لحد ما يصير كمية كبيرة كلش ويجيب سعد من بيت واحد بالقرية عربانة وتركتر يأجرهن ويروح هو ورائد وزيد يحطون الحطب بالعربانة
ومن يجيبوه احنا ننزلو ونحطو بالغرفة الي نحط بيها الحطب علمود ما يجيه ماي من المطر لحد ما ترسنا الغرفة ترس وبعدها توقفنا عن جمع الحطب
جان اكثر شي مخيف بحوش الحلال هو وجود عقارب بشكل كبيرة واكيد اكو حياية بس احنا ما نشوفهن ودائما نمنع الجهال يروحون للحوش وحدهم
بدت اول زخة مطر مع بداية الشتاء بشهر ال 11 جنت بالغرفة فاتحة البردة وحاطة راسي على ايديني واباوع وماما ولانة كاعدات وراي يحجن
جنت كلش احب الشتاء بس بنفس الوقت جانت حياة الريف بالشتاء متعبة بشكل لا يحتمل اي زخة مطر تصير الكاع طين ونتبهدل
جان الجو حلو وبعد مو مشغلين صوبة لان الغرف الطين سبحان الله عكس المناخ بالشتاء دافيات وبالصيف باردات مو مثل بيوت المدينة
مطرت شوية بس بللت الكاع وانقطع المطر المغرب رحنا للمطبخ علمود نسوي العشاء جنا نحط كونية عند كل باب نحط عليها تكرمون الاحذية الي بيها طين
سوينا العشى وبعد صلاة المغرب تعشينا بس صارت الدنيا باردة كلش وماما كالت هاي الضريبة (البرد الي يجي ببداية الشتاء ويكون مسؤول عن موت البساتين)
وصار البرد كلش قوي وهوا بارد كلش رحنا اني ولانة عالغرفة جنا مجهزين الصوبة لهيج حالة هي شالت الفانوس واني شلت الصوبة واخذناها للمطبخ
شغلناها وشوية واجو اخواني يتعللون جنا حاطين اللالة بالزاوية والصوبة بيناتنا واخواني يحجون عن مقالبهم وهم صغار واحنا نضحك عليهم
أنت تقرأ
ليس ذنبي
Romanceاحببت ما لم ارى وتمنيت العيش في ما بُني من الثرى فلا حلمٌ يفارقني ولا واقع يساعدني فتاة بريئة تعصف بها الحياة بسبب حسنة اُحتسبت ذنباً ارتكبته عمداً فهل سيبقى ذنباً ام تسطع عليه شمس الحقيقة كل هذا واكثر في رواية #ليس_ذنبي بقلم #احمد كونوا مع...
