ليس ذنبي

البارت (2)

#ليس_ذنبي
بقلم #احمد
البارت_2

هدى .. يلا سمو بالله وعوفو الكلام

جاسم .. بسم الله

گمر .. تريكنا عالسريع بين ما خلصنا اجو اخواني وزوجاتهم علمود يساعدون سعد بتكملة الغرف واني ولانة اخذنا العربانة ورحنا ويا بابا

العربانة هي الي يستخدموها بالبناء يحطون بيها رمل او اسمنت ويدفعوها احنا جنا ناخذها للبستان نحط بيها خضرة ونرجع

ومن جنت اروح ويا بابا رغم عمري 17 سنة بس ما البس عباية الف الشال والبس فوك هدومي زبون لان اهل القرية كأنهم اهلي كلش متعودين على بعض

(زبون ينلبس فوك الملابس) جانت القرية باكملها كأنهم عيلة وحدة بحيث من تسأل واحد منهم عن فلان يعرف مكان بيتو وعدد عيلتو وحتى اسماء زوجتو وبناتو

ومو معناها انو ما عدهم خصوصية بس مثل ما كلتلكم متعودين على بعض فلهذا يعرفون كلشي على بعض ومحد منهم يضوج من الثاني لان يعرف هالشي عنو

المهم طلعنا نتمشى ويا بابا وندفع العربانة وجان الي يشوفنا سواء زلمة لو مرة يسلمون على بابا ويصبحون عليه وهو يرد عليهم

البستان مو بعيد هواي بينو وبين القرية ارضين زراعيات وبعدهن نص الارض الي بابا يزرعها حنطة او شعير وبعدهن صاير البستان

بين ما وصلنا بدا الجو يحتر جانو فاتحين الماي عالبستان رحت عند البوري مال البير جانو مسوين مثل الحفرة صغيرة وصابيها بسمنت علمود ما يحفرها ماي البير

وجان الماي يطلع منها ويتوزع بالارض حسب التخطيط مال الزراعة غسلنا وجيهنا انا ولانة وحطيت رجليني بالماي جان بارد وبرودتو تخبل

بعدها رحنا على مكان الركي اخذنا ركية وحطيناها بالماي ورحنا نحوش (نجمع) حضرة حسب طلبات امي وبابا راح على حارس البستان ماعرف شيحجون

من كملنا الخضرة رجعنا عالركية لكيناها باردة بسبب الماي وماكو مثل هسا لازم سجين وشوكات وماعرف شنو لا طريقتنا اسهل بهواي

مجرد ضربنا الركية بالبلوك مال الحفرة وانكسرت وفتحناها من النص وكعدنا مقابيل بعض وهي كدامنا وصرنا ناكل منها بايدينا بدون كلشي

اعرف البعض منكم يكول شنو هالقرف بس اول شي غسلنا ايدينا اني ولانة وثانيا لو مجربيها وكاعدين ويا شخص تحبوه مثل حبي للانة راح يتغير رايكم

الشي الي اعتبرتوه مقرف حيكون احلى ذكرى الكم ويا الشخص الي تحبوه وثانيا ماكو قبل لا اتكيت ولا هالخرابيط على كولة سعد كول بايدك محد يفيدك

من خلصنا اكل من الركية غسلنا واخذنا العربانة ورجعنا وبابا بقى بالبستان ما يرجع ويانا وجنا اني ولانة نتناوب على دفع العربانة