ليس ذنبي

البارت (74) الجزء الثاني

#ليس_ذنبي
بقلم #احمد
البارت_74 الجزء الثاني

ملاك.. راح اوس وبقى قيس على اتصال وياه بس كل ما يحجي وياه يكول ماكو اي خبر عنو لحد ما صارت الدنيا فجر واتصل قيس على اوس وما رد

وبقى يتصل وما يرد اوس وتخبلنا تقريبا 10 دقايق وجاوب اوس كال لقيس لكينا ذيب بس مبين على صوتو تعبان كالو قيس وين انت هسا كالو بالمستشفى

قيس.. احجي شبيه ذيب

اوس.. اووووف ذيب انغدر يا قيس

ملاك.. من كال هيج وكع التيلفون من ايد قيس وتربط ما يكدر لا يحجي ولا يكدر يكوم الشيخ يسألو يريدو بس يجاوب وهو ساكت ما يحجي

الشيخة صار وجهها اصفر من الخوف وتريدو بس يحجي علمود يفهمون منو فجأة وبدون سابق انذار ركض مثل الصاروخ عالطابق الثاني

خلال 5 ثواني نزل وياه السلاح والشيخ يريد يمسكو ما يكدر وصاح قيس بطول صوتو ورب العزة وما اكون قيس ابن الشيخ عيدان اذا يبقى ثاري لباجر

وطلع يركض من البيت ودعاء تخبلت ووكعت بالكاع واني ماعرف شسوي اروح عالشيخة الي ما طلعت من الصالة لو اكوم دعاء الي واكعة بالكاع

سندت دعاء اخذتها للصالة وشفت الشيخة فاقدة الوعي رحت ركض جبت كلاص ماي بللت وجهها وكعدت بس ماعرف شنو جانت تحجي

جانت تبجي وكوة تطلع الكلمة ومناك دعاء تبجي واجت ياقوت لان سمعت الصوت شافتهن يبجن مسكت الباب ونزلن دموعها الي جانن منفوخات من البجي

اوس.. جنت افتر بالشوارع مثل المخبل عل  امل اشوفو او اشوف السيارة الى ان اجاني اتصال من المقدم وكفت السيارة وجاوبتو

كال لكينا السيارة ولكينا اخوك كلتلو بلهفة وينو هسا كال بالطريق للمستشفى لان متصوب بطلقة ونازف دم هواي روح للمستشفى فورا

من كال هيج احس اجتني ضربة على راسي هجمت بيتي هجم توجهت عالمستشفى بس تفكيري مو وياي لدرجة حادثين الله طلعني منهن بالكوة

من وصلت المستشفى نزلت من السيارة ودخلت ركض سألت عليه كالو بغرفة العمليات رحت للغرفة ودخلت فورا واجى ممرض يريد يطلعني

دفعتو وكلتلو كمل شغلك ما عليك بي رجع دفعني ويحجي بنتر واني منا طالعة روحي ضربتو بوكس وكعتو بالكاع وكلتلهم الي بيه خير يجي يطلعني

وما واحد منهم كدر يحجي او يطلعني ورجعو يكملون العملية وما حسيت الا انحضنت من ورا وانسحبت باوعت وراي شفت علي ماسكني

كلتلو علي عوفني لا تدخل وما سمع مني وسحبني كل قوتو وطلعني من الغرفة وسكر الباب كال خليهم يشوفون شغلهم كلتلو علي دا اكلك لا تدخل

ضربني بوكس كل قوتو كال اصحى عاد وجودك مو زين عل  ذيب بعدين محتاجين الو دم بدال ما تلكي دم يناسبو واكف مثل الصنم داخل