ليس ذنبي

البارت (60)

#ليس_ذنبي
بقلم #احمد
البارت_60 الجزء الثاني

ملاك .. طلعت من الغرفة دخلو وجانت وياهم بنت صغيرة عمرها يمكن 10 سنوات بس مبين عليها خايفة ودا تبجي وتسحب بنفسها وذيب يحاول يدخلها للصالة

جان المنظر غريب ومحير منو هاي وليش جابوها وليش ما تقبل تدخل وشعدها هنا اخير شي البنت فقدت الوعي وسندها ذيب وشالها دخلها للصالة

طبعا للتوضيح الصالة صايرة قسمين قسم الي نكعد بيه صاير مثل الغرفة ومعزول لحالو والقسم الثاني يكون بابو عالخارج ومن خلالو نصعد عالدرج او نروح للصحيات او الغرف والمطبخ

البنت جانت واكفة عن الباب الخارجي من فقدت الوعي شالها ذيب ودخلها للصالة الداخلية عند الحجية وطلعو هو وقيس واني وكفت عند الباب الداخلية

نهلة .. بسم الله الرحمن الرحيم منو هاي ابو اوس

عيدان .. بقوها يمكم لحد ما نشوف شنو موضوعها

نهلة .. منين جبتها ووين اهلها

عيدان .. اهلها جانو يريدون يقتلوها وعلى اخر نفس لحكناها ماعرف شراح يصير من تكعد بس حتى لو تعدت عليكن ممنوع تطلع من البيت

نهلة .. إن شاء الله ما نخليها تطلع

عيدان .. يلا اني رايح للمضيف العشيرة كلها موجودة

نهلة .. سمر ناوشيني الماي من يمج

ملاك .. انطتها كلاص الماي جانت الشيخة حاطة البنت بحضنها بللت ايدها ومسحت على وجهها وبلشت البنت تكعد بس مو مركزة

من صحت وباوعت عالشيخة كمزت كمزة مو طبيعية وسحبت على صفحة وحضنت ركبها وصارت تبجي وجان منظرها يكطع الكلب

جنا كلنا مستغربين من منظرها بس ماعرف ليش حسيت انو اني الوحيدة الي راح اكدر افهم وضعها لان اهلها حاولو يقتلوها مثل ما حاولو اياد وحسان

تقربت عليها وجنت كلما اتقرب احسها ترتعب اكثر تخيلو بنية صغيرة بالعمر ويصير وياها هيج شي وتفقد امها من تكون بامس الحاجة لحنانها وحضنها

كعدت مقابيلها عالقنفة مديت ايدي اول ما طخيت ايدها فزت وسحبت نفسها ورا رجعت مديت ايدي ومسكت ايدها بايدي اليسار وما خليتها تسحبها

وبايدي اليمين صرت افرك ايدها على كيفي وشوية شوية بدت تهدا ورغم ما جنت افهم معنى الي دا اسويه بس من سويت هيج احسها ارتاحت لحركتي

بدت دموعها تخف سحبت ردني (كمي) حطيتو على الابهام ومسحت دموعها كلتلها بصوت ناصي لا تخافين ماطول انتي يمي محد يكدر يأذيج بعد

بقت ساكتة بس عيونها تحجي الف قصة وقصة ماعرف شصاير وياها وليش يريدون يقتلوها وشنو ذنبها بس عيونها جان اكبر اثبات على برائتها