ليس ذنبي

البارت (10) الجزء الثاني

#ليس_ذنبي
بقلم #احمد
البارت_10 الجزء الثاني 

جماعة الواتباد يعني مشاهدات اكثر من 200 او 300 وتعليقات يا دوبها توصل 10 يعني التعليق الي ما ياخذ من وقتك ثواني دا اتعب ساعات علمودو عالقليلة قدرو الوقت الي اكتب بيه علمودكم

ملاك .. كوة كدرت اقنعها ومن راحت كلت لسارة انتي تريدين الناس تحفظ اسرارج ومن تشوفين شي ما تتحملين تسكتين شوية كالت ببرود لان السالفة مو سالفة ماي حار

بقيت ساكتة علمود ما يزيد الموضوع الى الحد الي يجبرني احجي بالي صار وتزيد الفضيحة وعرفتها شافتني من جنت اشوف الضماد بالمراية

بقيت وياها للمغرب بس تورطت لان ويا كل حركة اتوجع واقاوم واسوي نفسي طبيعية علمود ما تنتبهلي وهي جانت ملتهية بالتيلفون لان جايبة العاب وفيديوهات

جانت مندمجة كلش بالتيلفون وبصراحة ما الومها لان جان ذاك من ذاك الي عندو هذا التيلفون وبالاخص هي هسا جايبة العاب جديدة ودا تجربهن

وقت النوم اجى الافندي صعد فوك وما لحكتو جانت تباوعلي عمتي واني مادري بيها وجانت شاكة انو صاير بيني اني وحسان شي بس ما تريد تسألني

بقيت وياهم لحد ما خلص المسلسل وصعدت جان نايم فرشتلي فراش بالكاع وتمددت بيه وكوة نمت جنت خايفة يتكرر الموضوع مرة ثانية

صحيح جان ما يكدر يسويه لان اهلو موجودين ولان متأذية بس تعرفون انتو الواحد يبقى بيه خوف وما يروح هذا الخوف بدون دليل قاطع

بوقتها صرت اشوف الشيطان ولا اشوف حسان بحياتي كلها ما توقعت اكره احد الى هاي الدرجة وللاسف هالشخص هذا زوجي الي جنت اتمنى يكون سندي طول العمر

كعدت الصبح لكيتو نايم وعالسريع شلت الفراش ونزلت بدون حتى ما اغسل وجهي علمود قبل لا يكعد انزل من الغرفة وغسلت وجهي بالمطبخ

جان اصعب شعور من الواحد يحاول يبين للمقابل ان ماكو شي وهو عايش بجحيم وجان هذا وضعي ويا اهل حسان احاول اوضحلهم ماكو شي والعكس صحيح

مر اليوم طبيعي وحسان مبين انو حتى ما يعرف اني نمت لحالي وجان ما يحجي وياي واهلهم لاحظو بس ما حبو يتدخلون علمود ما تزيد المشكلة

ثاني يوم من طلع حسان فتحت الضماد جان جسمي صاير خريطة وحتى تعجبت معقولة كل هذا صاير من الليفة حتى لو سجين ما يصير بيه هيج

جبت كلينكس مرطب ونظفت مكان الجروح وحطيت عليهن مرهم ورجعت لفيتهن بس ما خلصت الا اني طالعة روحي من الوجع واحس المرهم يحركني

بقيت بالغرفة شوية الى ان راح الوجع وبعدها نزلت تحت وكملت يومي طبيعي وحسان عرف انو دا انام لحالي والغريبة انو ما حجى شي ولا فتح الموضوع

جنت محتارة وما ادري هو حاس بغلطو وندمان لو يعتبرني غلطانة وتاركني على واهسي بس لو متندم جان اعتذر وكال بدون قصد وماتنعاد مو يبقى ساكت