#ليس_ذنبي
بقلم #احمد
البارت_6
گمر .. ماما تعرفيني ما اتجاوز على احد بس بعض ناس يجبرون الواحد يتجاوز عليهم
هدى .. عوفيهم يمة تجاهليهم وهاي هي
لانة .. السلام عليكم
هدى .. هلا يمة تعالي كعدي
گمر .. مرت الايام وماما راحت للسوك تسوكت وجابت وياها الجهاز جانت جايبة كلشي يخطر على بال العاروس بذاك الوقت
قماش وملابس جاهزة وعطورات ومكياج بس المكياج مو مثل مكياج هالوقت هذا جان اقل بهواي واحذية وجانت جايبة قماش مال فرش
قبل جهاز العاروس يحتوي على اهم شي والي هوا الفرش والي يسووهن اكثرهن من صوف الغنم مثل اللحف او الجودليات والبطانيات الجاهزة
الجودلية (تشبه الدوشك بس تكون من الصوف وتنفرش للكعدة عليها او النوم في بعض الاحيان)
اللحاف (ينحط فوك البطانية بايام الشتاء الباردة ويكون من الصوف)
فماما اشترت اول شي القماش بعدين راحو هي وبابا اشترو صوف بس الله لا يشوفكم الي شفناه بسبب الصوف من صدك كرهت الزواج بسببو
جان مليان شوك ووصخ وتراب بحيث من احطو بالكاع واصب فوكو ماي الماي يصير اسود من الوصخ الي بيه غير الريحة الي بيه بسبب الوصخ
جانت ماما جايبة يمكن 100 جزة يعني ورطة من هاي التمام جان من يجي الكهرباء نعبي التوانكي وبالوقت الي يبقى نحاول نغسل صوف
بس الحمدلله بوقتها وجود ماما ولانة والجناين خفف علي التعب جانن كل وحدة تغسل شوية وانقسم الصوف 5 اقسام كل وحدة تغسل 20
من خلصنا غسيل شريناه علمود ينشف وضربتو الشمس يومين لحد ما نشف كلش واجى وقت النفش والي لازم نطلع شكو شي باقي بيه وما طلع بالغسل
جنا نكعد العصر اني وماما ولانة والجناين ونبقى ننفش للمغرب ويوميا على هالمنوال هذا بحيث من خلصنا ايديني تفطرن وصارن يوجعني بسببو
من خلصنا اخذتو ماما هو والقماش ودتو لوحدة تخيط لحف وجودليات خلتها تخيط 3 جودليات ولحافين ودواشك صوف ثنين و10 مخدات
يمكن صار الوصف هوسة بس راح ابسطو الكم من كمل الجهاز جان الفرش 3 جودليات و 2 لحف و 10 مخدات ودواشك 2 ووياهن 3 بطانيات وحدة شتوية و 2 صيفيات
هذا جان الفرش الي لازم اخذهن وياي من اروح وباقي الجهاز الي هو الملابس وغيرهن فنحطهن بجنط وماما جايبة ويا كل جنطة قفل صغير ومفتاح
تخاف انو بيوم العرس تدخل وحدة للغرفة وتلعب بالغراض لذلك قفلتهن وخلت المفاتيح كلهن سوا علمود محد يكدر يفتحهن غيري
من اجى عيد الاضحى بابا ذبح خاروف وجانت الاجواء شبيها بعيد الفطر بس الاختلاف انو بعيد الاضحى صارت شوية حارة الدنيا مو مثل عيد الفطر
أنت تقرأ
ليس ذنبي
Romansaاحببت ما لم ارى وتمنيت العيش في ما بُني من الثرى فلا حلمٌ يفارقني ولا واقع يساعدني فتاة بريئة تعصف بها الحياة بسبب حسنة اُحتسبت ذنباً ارتكبته عمداً فهل سيبقى ذنباً ام تسطع عليه شمس الحقيقة كل هذا واكثر في رواية #ليس_ذنبي بقلم #احمد كونوا مع...
