ليس ذنبي

البارت (65) الجزء الثاني

#ليس_ذنبي
بقلم #احمد
البارت_65 الجزء الثاني

اوس .. من وصلت يم ذيب كلتلو روح اطلع خارج المستشفى وارجع بسرعة دا احس ان اكو احد يراقبنا واذا شفت احد لا تحجي وياه بس انطيني خبر

كال تمام وراح وكعدت اني انتظر وجانت مركز 100% بس مسوي نفسي ملتهي بالتيلفون وتقريبا 5 دقايق اتصل ذيب كال لا تتحرك ابقى مكانك هسا اجيك ومبين عليه يركض

اريد احجي وفصل الاتصال وخابرتو بس ما رد والمشكلة ماكدر اعوفها لان هو كال لا تعوفها ووكعت بين نارين من جهة البنية ومن جهة ذيب

بقيت اتصل عليه الى ان جاوب كلتلو بعصبية وصوت عالي مو دا اتصل عليك صار ساعة جاوب وهو يسحب انفاس سريعة كال جايك هسا واحجيلك

انتظرتو الى ان اجى تعبان كعد عالكرسي ارتاح شوية وكال من طلعت ما حسيت بوجود احد فرجعت فورا وعلى نص الطريق اجتني فكرة

انداريت ورجعت اركض باتجاه الخارج وانصدمت ان واحد طلع يركض كدامي هو عبالو اني ادري بيه واني انصدمت انو موجود وما حسيت بيه

ركضت وراه علمود امسكو بس جان كلش سريع وما لحكتلو ومن جنت تتصل علي ما كدرت اجاوب لان جنت الحكو وما اكدر ارد عالاتصال

كلتلو هو اخوها الي جان موجود ويا امها كال لا هذا اول مرة اشوفو ماعرف ان كان واحد من اخوانها البقية او شخص غريب عنهم

كلتلو اذا غريب شجابو كال مو بعيد يكونون اخوانها دازيه او يجوز هو هذا نفسو ابن عمها او احد من عمامها اكو هواي احتمالات

كلتلو ابن عمها بالتوقيف كال والله ماعرف لعد كلتلو سهلة سهلة ما صار شي وكعدت عندو وبقينا للصبح عدها الصبح كلتلو راح اروح اجيب ملاك واجي

كال ليش تجيبها كلتلو اولا تساعد البنت لان اليوم تطلع ثانيا وعدتها كال تمام وعفتو ورجعت للبيت اهلي بعدهم نايمين وما يعرفون بي رحت لذيب

كعدت ملاك وكلتلها كومي تريكي علمود نروح لياقوت كالت تمام وكامت سوت الريوك وبين ما استوى الجاي جهزت نفسها وتريكنا سوا وطلعنا

جانت جايبة وياها علاكة ملابس لياقوت كلتلها احتمال اليوم يجون يحققون وياها فانتي ابقي يمها لا تعوفيها لحالها كالت إن شاء الله

ملاك .. كملنا طريقنا الى ان وصلنا المستشفى جان ذيب موجود بس مبين عليه التعب خطية صارلو من البارحة العصر مدري شلون تحمل لحد الان

كالو اوس روح للبيت ارتاح كال تمام وعافنا فورا وراح للبيت واني باوعت من باب الغرفة على ياقوت جانت نايمة ورجعت طلعت خارج

انتظرناها الى ان كعدت واجت الدكتورة فحصتها كلت للدكتورة وياي ملابس اريد البسهن الها اذا يصير كالت هسا تجي ممرضة تساعدج