Under the Sky

Part 49

" පුතා! එන්න තේ බොන්න."

මම හා ලකීෂ් කතාව නවතා දමා විසිත්ත කාමරයට පිවිසියේ තේ පානය සඳහායි. ඉන් අනතුරුව ද සෑහෙන වේලාවක් ඕපාදූප දෙඩවීමෙන් අනතුරුව ලකීෂ් නිවසින් පිටත්වූයේ ය. මම මාගේ නිදන කාමරය අස්පස් කිරීමෙන් අනතුරුව වේලාසන නින්දට ගියේ හෙට දිනයේත් නැවත පාසල් යා යුතු නිසා ය.

පසු දිනය තරමක් කලබලකාරී විය. දෙමාපියන් පැමිණීමට ප්‍රථම ප්‍රගති වාර්ථා, ලකුණු වාර්ථා සකස්කර අවසාන විය යුතු ය. නමුත් වාසනාවකට මෙන් මෙවර මම පන්තියේ වැඩි කාලයක් නොසිටි බැවින් එම කාර්‍යයන් පන්ති නායකයා ඇතුලු වෙනත් සිසුන් පිරිසක් සිදුකර අවසාන වී තිබුණි.

" මේ ශේන්ගේ අම්මා ද?"

" ඔව් මිස්."

මම අම්මා හා පන්තිභාර ගුරුතුමිය සංවාදයේ යෙදෙන අයුරු නිරීක්ෂණය කළේ නොසන්සුන් සිතින් ය. මම ඔවුන් දෙදෙනාට තවත් සමීපවූයේ ඔවුන්ගේ කතාබහ හොඳින් ශ්‍රවනය කිරීමටයි.

" ශේන් මේ පාර තුන්වෙනියා. වෙන ළමයෙක් නම් තුන් වෙනියා වෙන එක හොඳයි. ඒත් කලින් වතාවේ පළවෙනියා තුනට බැහැපු එක නම් ඒ තරම් හොඳ දෙයක් නෙමෙයි."

ඇය අම්මා වෙත පැවසුවේ මා වෙත තියුණු බැල්මක් ද හෙළමිනි.

" ඒක තමයි මිස් මාත් කිව්වේ. මෙයා මේ බාහිර වැඩ කරන්න පටන් අරගෙන ළකුණු අඩු කරගන්න එකට නම් මමත් විරුද්ධයි. "

" හැබැයි ශේන්ගේ අම්මේ ඉගෙන ගන්න එකට අමතරව බාහිර වැඩ කරන එක නරක දෙයක් නෙමෙයි. මමත් අවවාද කළා ශේන්ට, ඒ දෙක ම සමබරව කරගෙන යන්න කියලා. හැබැයි මේක දිගට ම සිද්ධවුණොත් නම් අපිට තීරණයක් ගන්න සිද්දවෙනවා."

" මමත් ඕක ශේන්ට කිව්වා මිස්. ලබන වාරේ ලකුණු නැත්නම් ඔය බාහිර වැඩ හැම දෙයක් ම නතර කරන්න වෙයි කියලා."

මම ලබාදුන් පොරොන්දුව එතරම් හොඳින් ඈ මතකයේ තබාගනු ඇති යැයි මම කොහෙත් ම සිතුවේ නැත. එසේ නම් ලබන වාරයේ ලකුණු අතිශය තීරණාත්මක වනු ඇත.

දෙමාපිය රැස්වීමේ වැඩකටයුතු අවසාන වීමෙන් අනතුරුව අම්මා පිටවගියා ය. ඒ අතරේ මම පාසල පුරා ලකීෂ්ව සොයමින් ඇවිද ගියෙමි. ඔහු දෙමාපිය රැස්වීමෙන් අනතුරුව කොහේ හෝ අතුරුදහන් වී ඇත. මම අපගේ පන්තිකාමර අසල හා ආපනශාලාවේ ඔහු සොයාගැනීමට නොහැකි වූ කල උසස්පෙළ පන්තිකාමර පවතින ගොඩනැඟිල්ල ආසන්නයෙන් ගමන් ගනිමින් ම වැසිකිළිය ආසන්නයට ද ගොස් පරීක්ෂා කිරීමට ඉටාගත්තෙමි.