ရုပ်ရှင်ဧကရာဇ်၏ သေလမ်းရှာ စေ့စပ်ထားသူလေး [ ဘာသာပြန် ] || Extra ||

Chapter 23

Unicode

ဝေ့ရွှင်း ရုတ်တရက် သိနားလည်သွားသည့် ကိစ္စရပ်တစ်ခု
_________________________________

ယွီရွေ့ အတန်းပြီးတာနဲ့ သူတို့ချိန်းထားသည့်ကော်ဖီဆိုင်ဆီအပြေးလေးရောက်လာခဲ့သည်။ သူနဲ့ယွင်လျန်က ယွင်လျန်အထွက် ယွီရွေ့အဝင်ဆိုသလိုမျိုး ကပ်လွဲသွားတာကြောင့် အောက်ထပ်တွင် ကိတ်မုန့်ရွေးပြီး ဆိုင်ဝန်ထမ်းကိုဗန်းထဲထည့်ပေးဖို့တောင်းဆိုနေသည့် ဝေ့လန်နှင့်တန်းတိုးသည်။ ဝေ့လန်တို့ ယွမ်ရှောင်ဖန့်တို့ဆိုတာ မူကြိုအရွယ်ကတည်းက သူ့ညီမနဲ့လာလာဆော့နေကြ ကလေးလေးတွေဖြစ်တာကြောင့် ဒီကလေးတွေတဖြည်းဖြည်းအရွယ်ရောက်လာကြတာကို စောင့်ကြည့်လာခဲ့ရသူပီပီ ယွီရွေ့ ဒီကလေးတွေကိုအရမ်းချစ်သည်။ ထို့ကြောင့် သူ ဝေ့လန်အနောက်ကို တိတ်တိတ်ကလေးလျှောက်သွားကာ ဆိုင်ဝန်ထမ်း ဝေ့လန်ကိုလှမ်းပေးနေသည့် ဗန်းအားဆွဲလုပြီး ကလေးကိုစနောက်လိုက်သည်။

ဝေ့လန်လည်း လက်ထဲရောက်လာတော့မည့်ကိတ်မုန့်ဗန်းက ရုတ်တရက်ကြီးဆွဲလုခံလိုက်ရတဲ့အတွက် လန့်သွားပြီး ဘယ်သူကသတ္တိကောင်းနေသလဲဟု ဘုကြည့်, ကြည့်လိုက်စဥ် ယွီရွေ့ဖြစ်နေမှန်းသိလိုက်ရတာကြောင့် ထရယ်လေသည်။

'' ကောကော ရောက်လာပြီလား~ ''

ယွီရွေ့ကလည်းပြန်ပြုံးပြရင်း

'' ဘာလို့ ဒီတစ်ခုထဲလဲ ''

'' ကျွန်တော်နဲ့လင်လင်နဲ့ အများကြီးမှာပြီးသွားပြီ ဒီတစ်ခုကကျ သူတို့ကပ်ထားတဲ့ posterမှာ အရသာအသစ်ထွက်တယ်ဆိုပြီး ပြောထားတာမြင်မိလို့ စားချင်တာနဲ့ အောက်ဆင်းပြီးလာယူတာ ''

'' တခြား ဘာစားချင်တာရှိသေးလဲ ''

ဝေ့လန် ခေါင်းခါပြလိုက်ကာ

'' ကောကောရော ဘာစားချင်တာရှိလဲ ''

ယွီရွေ့ကတော့ အချိုစာတွေကြိုက်တဲ့အရွယ်လွန်သွားပြီဖြစ်တာကြောင့် ဘာကိတ်မုန့်ဘာသရေစာမှမစားချင်ပါ။ သို့သော် သူကဖိတ်ကျွေးတဲ့လူပီပီ သူများစားနေတဲ့အချိန် ဒီတိုင်းကြီးထိုင်နေတာကမကောင်းတာကြောင့် အအေးတစ်ခွက်မှာလိုက်ကာ တခြားဝေ့လန်တို့ကြိုက်လောက်မည့် သရေစာမုန့်အချို့ယူပြီး ဝေ့လန်နဲ့အတူတူ အပေါ်ထပ်လိုက်လာခဲ့သည်။