မချိုပေမယ့်...မခါးပါဘူး

Chapter 51

~ La Belle Femme ~
💜 Unicode 💜

မတွေ့ရတာကြာပြီနော်....Emeras"

ဟုတ်ပါရဲ့...မတွေ့ရတာကြာပြီပဲ ဒေါ်မိုးဦးသွင်...ဒါမှမဟုတ်....ကျနော်ဒီလိုခေါ်သင့်လား....Mrs. Landon"

နဂိုတိတ်ဆိတ်နေတဲ့ဆိုင်လေးက အရှိန်အဝါကြီးတဲ့လူနှစ်ဦးရဲ့ စစ်အေးတိုက်ပွဲကြမ်းကြောင့် အပ်ကျသံပင်တစ်စမကြားရအောင် တိတ်ဆိတ်သွားလေသည်။ ဒေါ်မိုးဦးသွင်ဆိုသည်မှာ မျက်နှာကျသေးသွယ်သွယ် လက်သွယ်သွယ်နဲ့ နွေဦးငယ်နဲ့တူလွန်းတဲ့ မျက်ဝန်းနက်နက်တွေပိုင်ဆိုင်ထားသည့် နွေဦးငယ်၏ မိခင်အရင်းဖြစ်သည်။

သမီးဖြစ်သူကို လက်ဝယ်ပိုက်ချီထားရမယ့် အရွယ်လေးမှာတင်ပစ်သွားတဲ့ မိခင်ဖြစ်သူ။ ရက်စက်တဲ့နှလုံးသားနဲ့ ပြတ်သားရဲရင့်တဲ့အကြည့်တွေပိုင်ဆိုင်ထားသည့် ထက်မြတ်သည့်အမျိုးသမီးတစ်ဦးဆိုသည်မှာ ဘယ်သူကြည့်ကြည့်ခန့်မှန်းနိုင်မှာ မြေကြီးနှင့်လက်ခတ်မလွဲပေ။ ဒီအမျိုးသမီးဟာ Emeras ဘဝတစ်လျှောက်လုံးမှာ ပြန်ဆုံရမှာအကြောက်ခဲ့ဆုံးလူဟုဆိုရလျှင်လည်း မမှားပါ ။ အထူးသဖြင့် နွေဦးငယ်နဲ့ပတ်သတ်လာလျှင်ပေါ့။

ဘာကိစ္စလဲ ဒေါ်မိုးဦးသွင် ခင်ဗျားနဲ့ကျုပ်ကြားမှာ တွေ့ဖို့ကိုစာပို့ချိန်းဆိုရလောက်တဲ့ အရေးကြီးကိစ္စတော့ မရှိဘူးလို့ထင်တာပဲနော်။ "

သူ့စကားမှာထိုအမျိုးသမီးက နှုတ်ခမ်းစွန်းလေးပင့်တက်သွားရုံ ပြုံးလေသည်။ လက်ကကိုင်ထားလက်စ Chamomile tea တစ်ခွက်ကို နှုတ်ခမ်းဖျားစွတ်စိုရုံတစ်ငုံသောက်ပြီး အောက်ခံပန်းကန်ပြားဆီ အသံတစ်စမှမကြားရလေအောင် ဖြေးညှင်းညှင်းပြန်ချလိုက်သည်။

ငါ့သမီးကိုငါတွေ့ချင်တယ်။ "

အေးစက်လွန်းတဲ့ အသံအနေအသံထားဆိုပေမယ့် Emeras ကိုပူလောင်သွားစေဖို့တော့ လုံလောက်ပါသည်။ သို့ပေမယ့် သူ့စိတ်ကိုသူလုံလုံလောက်လောက်ထိန်းနိုင်ဖို့ လေသံကလေးနဲ့ တစ်ချက်တော့ဟက်ခနဲရယ်လိုက်ပါသေးသည်။

ဟက်....ခင်ဗျားသမီးကိုတွေ့ချင်တာ အိမ်ပြန်တွေ့လေ ကျုပ်ဘယ်သိမလဲဗျ။ ကျုပ်ဆီမှာရှိတာက ကျုပ်သမီးလိုချစ်ရတဲ့ ညီမလေးတစ်ယောက်ထဲရှိတာ။ "