♡ប្តូរកាយវង្វេងស្នេហ៍♡

ប្ដូរកាយវង្វេងស្នេហ៍(១០)

" ល្បិចកល "

ម៉ាតលក់ទំនិញ

ឆេមី កាន់មីកំប៉ុងក្តៅហុយៗនិងទឹកដោះគោជូរដើរមកអង្គុយតុខាងមុខម៉ាតលក់ទំនិញជាមួយលោកគ្រូ មីនយ៉ុង ដែលកំពុងអង្គុយមើលវីដេអូក្នុងទូរស័ព្ទរបស់នាង។
« វីដេអូមួយនេះអាចធ្វើឲ្យកេរ្តិ៍ឈ្មោះរបស់ ហេអុីន កាន់តែអាក្រក់ឡើងបាន តាមព័ត៌មានដែលខ្ញុំទទួលបានមក មួយរយៈនេះសមាជិកក្រុមហ៊ុន សាន់ហ៊ូ គ្រុបកំពុងតែព្រួយបារម្ភចំពោះអ្នកស្នងមរតកស្រីរូបនេះណាស់ បើវីដេអូនេះចែកចាយចេញទៅ លោកតារបស់នាងច្បាស់ជាត្រូវឈឺក្បាលទៀតមិនខានទេ » លោកគ្រូ មីនយ៉ុង ហុចទូរស័ព្ទមកឲ្យស្រីក្រមុំដែលអង្គុយច្របល់មីទល់មុខ។
« តើវីដេអូនេះអាចធ្វើឲ្យ ហេអុីន ត្រូវដកចេញពីបញ្ជីឈ្មោះអ្នកស្នងមរតករបស់ សាន់ហ៊ូ គ្រុបដែរទេ? » ឆេមី សួរគំនិតរបស់លោកគ្រូ មីនយ៉ុង។
« មិនងាយទេ លោកតា សាន់ហ៊ូ មិនងាយដកចៅស្រីរបស់ខ្លួនឯងចេញដោយងាយៗឡើយ ព្រោះបើ ហេអុីន ត្រូវដកចេញពីតំណែងនោះ សង្គ្រាមដណ្តើមអំណាចក្នុងសាន់ហ៊ូគ្រុបនឹងកើតឡើង »
« ប៉ុន្តែបើ ហេអុីន នៅតែបន្តបែកធ្លាយរឿងអាក្រក់បែបនេះជាបន្តបន្ទាប់ ទោះជាលោកតា សាន់ហ៊ូ ក៏ជួយរក្សាតំណែងជាអ្នកស្នងមរតកនេះឲ្យនាងមិនជាប់ដែរ ខ្ញុំនឹងចែកចាយវីដេអូមួយនេះក្នុងអុីធើណេត ហើយខ្ញុំក៏មានគម្រោងការណ៍មួយទៀតដែរ »
« តើជាគម្រោងការណ៍អ្វី? »
« ខ្ញុំដឹងមកថា យេរីន ដែលជាសមាជិកម្នាក់របស់ក្លឹបសិក្សាពិសេសនិងជាមនុស្សម្នាក់ដែលជិតស្និតនឹង ហេអុីន នោះធ្លាប់ស្រលាញ់គ្នាជាមួយ រីកគី ហើយខ្ញុំនឹងធ្វើឲ្យស្នេហាត្រីកោណមួយនេះប្រែក្លាយជាអណ្តាតភ្លើងដែលអាចឆាបឆេះ ហេអុីននិងក្រុមសិស្សនៅក្នុងក្លឹបសិក្សាពិសេសមួយនោះបាន ដល់ពេលនោះយើងប្រាកដជាបានតម្រុយរបស់ មីនយូ មិនខាន » ឆេមី ញញឹមឡើងយ៉ាងសមចិត្តចេញមក ព្រោះនាងនឹងកម្ទេចពួកសិស្សទាំងអស់នោះឲ្យខ្ចេចមិនឲ្យពួកគេបន្តធ្វើបាបអ្នកដទៃបានទៀតទេ។
« សង្ឃឹមថាក្រោយពីបំបាក់ពួកក្មេងៗទាំងអស់នោះហើយ យើងអាចរក មីនយូ ឃើញទៅចុះ » លោកគ្រូ មីនយ៉ុង ញញឹមឡើងដោយក្តីសង្ឃឹមពេលបានស្តាប់គម្រោងការណ៍ល្អៗរបស់ ឆេមី ហើយ។