♡ប្តូរកាយវង្វេងស្នេហ៍♡

ប្តូរកាយវង្វេងស្នេហ៍(១៨)

ភាព១៨

" ប្រថុយ "

បន្ទប់វីអាយភី

រីកគី បានឆ្លៀតឱកាសដែលស្រីៗមិនបានចាប់អារម្មណ៍គេបានលួចបង្កប់កាំមេរ៉ាតូចមួយនៅជាប់រូបថតលំអរលើជញ្ជាំងដែលអាចបង្ហាញទិដ្ឋភាពស្ទើរទាំងស្រុងក្នុងបន្ទប់បានយ៉ាងច្បាស់។ រីកគី អង្គុយចុះហើយសម្លឹងកែវស្រាដែលកំពុងចាក់បំពេញដោយសិស្សស្រីម្នាក់ដែលដៃរបស់នាងកាន់កែវស្រាដោយសភាពញ័រខ្លាំងហើយនាងតែងតែលួចសម្លឹងមុខរបស់ អេននី ដោយភាពភ័យខ្លាច។
ប្រាវ!
រីកគី រុញកែវស្រាទម្លាក់តុឲ្យបែកខ្ទេចហើយក៏ស្ទុះក្រោកឈរឡើងភ្លាមៗធ្វើឲ្យ អេននី រហ័សក្រោកតាមគេដោយទឹកមុខងឿងឆ្ងល់និងភ្ញាក់ផ្អើល។
« អេននី មិត្តរបស់នាងគួរឲ្យធុញខ្លាំងណាស់ » រីកគី និយាយដោយចោលភ្នែកសម្លឹងទៅសិស្សស្រីដែលអង្គុយលុតជង្គង់លើឥដ្ឋចន្លោះសាឡុនពណ៌ក្រហមនិងតុដែលពេញដោយម្ហូបអាហារនិងគ្រឿងស្រវឹងរាយប៉ាយ។ គេបង្ហាញកាយវិការធុញទ្រាន់មិនពេញចិត្តចំពោះសិស្សស្រីម្នាក់នោះច្បាស់ៗហើយក៏ទាញកាតាបស្ពាយដើរចេញពីបន្ទប់នោះយ៉ាងលឿន។
« រីក...រីកគី! » អេននី រត់ទៅដល់មាត់ទ្វាក៏ឈប់ជើងទាំងខកបំណងព្រោះ រីកគី ចេញទៅបាត់ហើយ។ ប៉ុន្តែវិនាទីក្រោយមក ភាពខកបំណងរបស់នាងប្រែទៅកំហឹងមួយរំព្រិច អេននី ខាំបបូរមាត់ក្តាប់ដៃណែនដើរត្រឡប់ពីមាត់ទ្វាចូលមករកសិស្សស្រីដែលលុតជង្គង់លើឥដ្ឋឱនមុខចុះជាមួយសភាពរាងកាយញ័រទទ្រើកវិញយ៉ាងលឿន។
« មកពីនាង! »
« អួយ! » សិស្សស្រីស្រែកទាំងឈឺចាប់ទឹកភ្នែកហូរពេញថ្ពាល់ភ្លាមពេលត្រូវ អេននី បោចសក់ក្បាលរបស់នាងមួយដៃពេញទាញបញ្ច្រាសមិនប្រណីដៃ។
« ស្រីចង្រៃ! មកពីនាងធ្វើឲ្យបង រីកគី ចេញពីយើង មកពីនាង...» អេននី ចាប់បោកក្បាលរបស់សិស្សស្រីទៅនឹងតុមួយទំហឹងម្តងហើយម្តងទៀត គម្រប់បីដងទើបព្រមដកដៃចេញហើយដើរទៅយកស្បែកជើងកែងដែលនៅជិតជញ្ជាំងវិញ។
« អ្នកនាង ខ្ញុំសុំទោស ខ្ញុំខុសហើយ ហ៊ឹក! » សិស្សស្រីដែលមានឈាមប្រឡាក់ពេញចំហៀងមុខព្រោះស្នាមបែកនៅត្រង់សៀតផ្កាលើដៃសំពះ អេននី ទាំងយំអង្វរករឲ្យចៅហ្វាយនាយអត់ឱនឲ្យនាង។ តាមពិតនាងជាកូនអ្នកបម្រើក្នុងផ្ទះរបស់ អេននី ហើយនាងតែងតែត្រូវ អេននី វាយធ្វើបាបជាប្រចាំ អេននី តែងតែវាយនាងរាល់ពេលដែលខឹងឬមួរម៉ៅជាមួយការសិក្សា ស្នាមជាំនិងរបួសចាស់លើខ្លួននាងមិនទាន់បាត់ផង ពេលនេះនាងក៏ត្រូវទទួលយកការវាយធ្វើបាបពីចៅហ្វាយនាយម្តងទៀត។
« នាងគឺជាសត្វថោកទាប ស្រីចង្រៃ! នាងមានកិត្តិយសណាស់ដែលត្រូវវាយដោយកែវស្បែកជើងប្រេនតម្លៃថ្លៃបែបនេះ »
ឌឹបៗ
« អួយៗ ហ៊ឹក! »