♡ប្តូរកាយវង្វេងស្នេហ៍♡

ប្តូរកាយវង្វេងស្នេហ៍(០៦)

" សងសឹក "

ក្លឹបសិក្សាពិសេស
បន្ទប់ធំទូលាយដែលមានការតុកតែងដូចជាក្លឹបរាត្រីមិនសាកសមជាកន្លែងជួបជុំសិក្សាបន្តិចសោះ ប៉ុន្តែពួកគេបែរជាហៅថាក្លឹបសិក្សាទៅវិញ។ ហាន់ស៊ូ និង ដាអេ ឈរជក់បារីហើយលេងបុកប៊ីយ៉ាជាមួយគ្នាយ៉ាងសប្បាយរីករាយ។
« ខ្ញុំស៊ីបានមួយគ្រាប់ទៀតហើយ » ដាអេ បង្ហុយផ្សែងបារីចេញតាមមាត់ហើយញញឹមយ៉ាងសប្បាយចិត្ត។
« ថ្វីដៃរបស់នាងកាន់តែល្អឡើងហើយ » ហាន់ស៊ូ បោះកន្ទុយបារីទៅក្នុងធុងសំរាមហើយក៏ងាកមកសម្លឹងស្រីក្រមុំដែលអង្គុយផឹកស្រាតែម្នាក់ឯងនៅលើសាឡុនពណ៌ក្រហមជិតនោះវិញ។
« យេរីន ហេតុអ្វីថ្ងៃនេះនាងផឹកច្រើនយ៉ាងនេះ? » ដាអេ ឃើញ ហាន់ស៊ូ មិនហ៊ានសួរ ទើបនាងសួរជំនួស។
« គ្រាន់តែចង់ផឹកប៉ុណ្ណោះ គ្មានអ្វីទេ » មាត់របស់នាងនិយាយថាគ្មានរឿងអ្វី ប៉ុន្តែទឹកមុខរបស់នាងបញ្ជាក់ច្បាស់ណាស់ថាមានរឿងនៅក្នុងចិត្ត។
« មិនមែនកាត់ចិត្តពី រីកគី មិនទាន់បានទេដឹង? » ដាអេ បុកប៊ីយ៉ាបណ្តើរ និយាយជាមួយ យេរីន បណ្តើរ។
«...» យេរីន ស្ងាត់ពេលមិត្តសួរចំចំណុច។
« ស្ងាត់បែបនេះបញ្ជាក់ថាពិតហើយ » ដាអេ សន្មត់តាមការមើលឃើញរបស់នាង។
« ប៉ុន្តែថ្ងៃមិញលឺសិស្សក្នុងសាលានិយយថា រីកគី កំពុងតាមញ៉ែ ហេអុីន » ហាន់ស៊ូ ដែលស្ងាត់ចាំស្តាប់ជាយូចាប់ផ្តើមនិយាយម្តង។
« គេបោក យេរីន ហើយគិតទៅបោក ហេអុីន ទៀតមែនទេ? មើលទៅគេមិនទាន់ស្គាល់ ហេអុីន ច្បាស់ទេ » ដាអេ ញញឹមពេញដោយល្បិចកល។
« បានហើយពួកឯងឈប់និយាយរឿងអស់នោះទៅ ខ្ញុំមិនចង់លឺទេ ប៉ុន្តែក្លឹបសិក្សារបស់យើងពេលណាដំណើរកាលម្តងទៀត ពេលនេះនៅក្នុងក្លឹបសល់តែពួកយើងបីនាក់ទេ » យេរីន រហ័សប្តូររឿងព្រោះមិនចង់ស្តាប់រឿងដែលប៉ះពាល់អារម្មណ៍របស់នាង។
« មិនដឹងទេ ព្រោះពេលនេះ ហេអុីន បាត់បង់ការចងចាំហើយថែមមានឫកពារមិនដូចមុនទៀត ទើបគេប្រាប់ឲ្យយើងផ្អាកក្លឹបសិក្សាសិនហើយថែមមិនឲ្យនិយាយរឿងក្លឹបឲ្យ ហេអុីន ដឹងទៀតផង » ហាន់ស៊ូ ដើរមកយកកែវស្រានៅលើតុពីមុខ យេរីន ផឹកហើយដើរត្រឡប់ទៅលេងបុកប៊ីយ៉ាជាមួយ ដាអេ បន្ត។
« បើក្លឹបមិនដំណើរការរហូតដល់ការប្រឡងប្រចាំខែនេះ ពិន្ទុរបស់ពួកយើងនឹងធ្លាក់ដល់បាតមិនខាន » យេរីន និយាយឡើងទាំងព្រួយបារម្ភពេលនឹកដល់ពិន្ទុរបស់នាង។
« បើមិនចង់ឲ្យពិន្ទុធ្លាក់ក៏ខំរៀនបន្តិចទៅ » ដាអេ តបមកនាងវិញទាំងដូចជាមិនខ្វល់ខ្វាយពីពិន្ទុសោះ។
« ខ្ញុំទៅផ្ទះមុនហើយ ពួកឯងនៅលេងបន្តចុះ » យេរីន ផឹកមួយកែវចុងក្រោយហើយក៏ក្រោកឈរឡើងយកកាបូបមកស្ពាយដើរចេញទៅ។
« សង្ស័យប្រញាប់ទៅរៀនហើយ » ហាន់ស៊ូ សើចពេលឃើញ យេរីន ឈប់ផឹកហើយប្រញាប់ទៅផ្ទះពេលនិយាយរឿងពិន្ទុ។
« បើពិន្ទុរបស់នាងធ្លាក់ លោកប៉ារបស់នាងនឹងមិនទិញកាបូបប្រេនឲ្យនាងទេ » ដាអេ ក្រវីក្បាលហួសចិត្ត។