♡ប្តូរកាយវង្វេងស្នេហ៍♡

ប្តូរកាយវង្វេងស្នេហ៍(០៣)

ភាគ០៣

" ព្រាននារីចង់រៀបការ "

មួយសប្តាហ៍កន្លងផុតទៅ
ភូមិគ្រឹះលោកតា សាន់ហ៊ូ
ឡានទំនើបពីរគ្រឿងបើកកាត់របងផ្ទះពណ៌ប្រាក់កម្ពស់ពីរម៉ែត្រចូលមកកាន់បរិវេណដីធំល្វឹងល្វើយ ក្រៅពីភូមិគ្រឹះធំស្កឹមស្កៃឈរយ៉ាងរឹងមាំនៅកណ្តាលដីរាប់សិបហិចតាហើយ នៅជុំវិញភូមិគ្រឹះក៏មានផ្ទះវិឡាធំៗប៉ុន្មានខ្នងទៀតផងដែរ មិនត្រឹមតែប៉ុណ្ណោះ នៅមានសួនច្បារធំទូលាយស្រស់ស្អាតសម្រាប់ការសម្រាកលំហែរកាយចុងសប្តាហ៍និងមានកន្លែងវាយកូនហ្គោលធំដែលគ្របដណ្តប់ដោយវាលស្មៅពណ៌ប៉ែតងស្រស់។
« វ៉ាវ! ទីនេះមិនខុសពីរាជវាំងប៉ុន្មានទេ គ្រួសារអ្នកមានគេរស់នៅកន្លែងល្អបែបនេះមែនទេ? » អារ៉ាន់ អើតកតាមបង្អួចឡានសម្លឹងមើលគ្រប់យ៉ាងនៅក្នុងបរិវេណភូមិគ្រឹះរបស់លោកតា សាន់ហ៊ូ ហើយក៏ចំហរមាត់ធំៗ ព្រោះនេះជាលើកទីមួយហើយដែលនាងបានឃើញផ្ទះដែលធំបែបនេះ។
ង៉ក់!
ឡានទំនើបឈប់នៅមុខភូមិគ្រឹះហើយអ្នកបើកឡានក៏រហ័សចុះពីលើឡានរត់មកបើកទ្វាឡានឲ្យនាង។
ក្រាក!
អារ៉ាន់ បើកភ្នែកធំៗភ្ញាក់ផ្អើលម្តងទៀត ពេលទ្វាឡានបើកឡើងបង្ហាញឲ្យនាងបានឃើញមនុស្សជាច្រើនអ្នកនៅឈរមាត់ទ្វាភូមិគ្រឹះរងចាំទទួលនាង។
« ស្វាគមន៍ការត្រឡប់មកផ្ទះវិញណាចៅស្រីសម្លាញ់ » លោកតា សាន់ហ៊ូ ដែលឈរនៅមុខគេដើរចូលមកដឹកដៃនាងឲ្យចេញពីក្នុងឡានហើយក៏ឱបស្វាគមន៍នាងយ៉ាងកក់ក្តៅ។
« លោកប៉ាសប្បាយចិត្តណាស់ដែរកូនបានជាស្បះស្បើយឡើងវិញ » លោក ណាមឆុល ឈរនៅជិតភរិយាញញឹមមកកាន់កូនស្រី។
" លោកពូម្នាក់នេះជាលោកប៉ារបស់ ហេអុីន មែនទេ? ហេតុអ្វីមិនដែលបង្ហាញមុខនៅមន្ទីរពេទ្យសោះ?" អារ៉ាន់ គិតក្នុងចិត្តដោយភាពងឿងឆ្ងល់ ហើយទើបឆ្លើយតបទៅលោក ណាមឆុល វិញជាមួយស្នាមញញឹម។
« ចាស លោកប៉ា »
គ្រាន់តែនាងឆ្លើយតបបែបនេះសោះ ភ្លាមៗនាងក៏សង្កេតឃើញថាទឹកមុខគ្រប់គ្នាប្រែជាភ្ញាក់ផ្អើលគ្រប់គ្នា ទើបនាងចាប់ផ្តើមភ័យ។
" តើខ្ញុំនិយាយអ្វីខុសមែនទេ? " អារ៉ាន់ គិតក្នុងចិត្តហើយលួចចោលភ្នែកសម្លឹងមុខលោកតា សាន់ហ៊ូ ដែលលោកឈរនៅក្បែរដៃរបស់នាង ហើយក៏ឃើញថាសូម្បីលោកតាក៏ភ្ញាក់ផ្អើលដែរ។ តើមានរឿងអ្វី? នៅមានអ្នកបម្រើនិងអង្គរក្សទាំងអស់នោះទៀត ហេតុអ្វីពួកគេម្នាក់ៗប្រែទឹកមុខភ្ញាក់ផ្អើលដូចជាបានលឺអ្វីដែលមិនធ្លាប់លឺពីមុនមកបែបនេះ?។
« ឆាប់ចូលទៅក្នុងផ្ទះសម្រាកល្អជាង » អ្នកស្រី ជីអា ចូលមកប្តូរស្ថានការណ៍ ពេលមើលទៅគ្រប់គ្នាចាប់ផ្តើមស្ងាត់មាត់អស់ព្រោះតែ ហេអុីន បែបនេះ។
« ចូលទៅក្នុងផ្ទះទៅ »
លោកតា សាន់ហ៊ូ បណ្តើរនាងចូលទៅក្នុងផ្ទះទាំងទឹកមុខស្មើខុសពីពេលដែលនាងមកដល់ភ្លាមឆ្ងាយណាស់ ប្រហែលជានាងបាននិយាយអ្វីខុសពិតមែនហើយ។