نواف وقف سيارته قدام البيت وطالع بالمواقع .. سند وجولان ما رجعوا للان
اخذ نفس طويل ونزل من سيارته وتحرك للحوش وشاف عمه جالس على الكرويته الا كانت بالحوش ومعاه كذا شخص .. وميزها بيناتهم
نزل عيونه وتحرك يدخل البيت بس سمع واحد من اعمامه يتكلم
- انتظرناك امس بالمقبرة .. بس ما جيت
ألتفت نواف وطالعهم
- ليش المفروض اروح المقابر ؟
عمه
- عشان سنوية اخوك
نواف هز اكتافه
- ما عندي اخو ميت
وقفت وهيا تكشر
- ايوة انكره مو انت اصلا السبب في انو ابوي تنازل عن دمه وقاتله عايش بيناتنا !
نواف اخذ نفس عميق وهو يطالع اخته الكبيرة
- خدوج روحي بيت زوجك عندك عيال تنتبهي عليهم
خديجة تحركت ووقفت قدام نواف
- الا انقتل كان اخوك نواف .. اخونا !
نواف طالعها
- الحي ابقى من الميت .. وسند هو اخونا مو خالد
خديجة رفعت يدها وضربته على وجهه .. هو ظل واقف مكانه وغمض عيونه .. سمعها تبكي قبل ما تلف وجهها وتبعد عنه وهيا تغطي عيونها
فتح عيونه ورجع تحرك لجوة البيت
عند الباب شاف نوف الا كانت واقفة تنتظره
- دقيت عليك اقولك لا ترجع فليش ما رديت !
نواف نزل شنطته وجلس على الارض يفصخ جزمته
- برجع انام .. ما بيهمني مين برة
نوف سحبت شنطة نواف
- زعقت على ابوي وامي .. جلست تقولهم كلام غبي إلين خلت امي تبكي .. وابوي طردها عشان كذا جلست برة عند اعمامي
نواف هز راسه وهو يوقف
- فين امي ؟
نوف اشرت على الدرج
- في غرفتها ..
نواف اخذ نفس عميق
- يلا ؟
نوف ابتسمت وهزت راسها
- كنت انتظرك اصلا عشان نراضيها
تحركوا هما الاثنين لناحية جناح ابوهم واول ما فتح باب الجناح شاف ابوه جالس بالصالة وفاتح الدفاتر القديمة يتفرج على صورهم
مسح ابوهم عيونه وهو يبتسم
- تأخرتوا عليها
نواف راح ناحيت ابوه وباس راسه
- اسف انا الا تأخرت
ابوه طبطب على كتفه
- روح راضيها .. تعرف امك ما يفرحها الا شوفتكم انتم الاثنين
نوف هزت راسها وراحت لغرفة امها وفتحت الباب وشافتها فوق السرير حاضنة القميص الا رفضت تغسله من سنين .. بقع الدم الا عليه صارت سودة
نوف ظلت تطالع امها .. كل سنة ينكسروا ذي الكسرة بزي ذي الايام
نواف وقف ورى نوف وشاف القميص .. ما يقدر يسحبه او يرميه .. ما يقدر يعذب قلب امه بأنه يحرمها من اخر شي يذكرها بأخوه
أنت تقرأ
راجس
General Fictionيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
