راجس

7

راجس تحرك وهو يخرج من المركز
- شكرا لانك جبتني

سياف كان يمشي جنبه
- حاول تبعد عنهم الين موعد القضية .. واضح انهم حاطينك براسهم

راجس هز اكتافه
- المفروض ذا التحقيق اصلا ما يصير بس هما بيلعبوا بمعارفهم

سياف طالع براجس لما وقفوا قريب من سيارة سياف
- هو ذا .. انت عارف معارفهم فحاول تعقل الين تنتهي القضية

راجس هز راسه والتفت يطالع المواقف فسياف التفت يطالع يحاول يفهم راجس بيدور على ايش

بس لما قربت السيارة الرمادية منهم ووقفت قدامهم هو تفاجئ لما شاف سواقها يتركها بوسط الطريق وينزل منها وهو يطالع براجس الا ابتسم وهو يتحرك ويحضنه
- توقعتك تتأخر !

جولان ضم راجس بالقوة قبل ما يحط يده على خد راجس ويطالع فيه
- فيك شي ؟! .. ليش انت هنا ! فجعتني لما قلتلي اجي اخذك من المركز

راجس ضحك وهو للاز يعتبر بين يدين جولان
- شوية مشاكل مع اعمامي .. لا تركز

جولان طالع براجس بحنية
- ياخي لا تفجع قلبي كذا .. وذول لو ما بيجيبوها البر والله لعلمهم انو الله حق !

راجس مسك يدين جولان
- اهدأ ما صار شي ! .. كيف كانت جلستك ؟!

جولان ابتسم
- كويسة .. حسيت بشي غريب .. المهم بكلمك واحنا ناكل لانو اكيد جيعان

راجس حط يده على بطنه
- اييييه ما مداني افطر !

سياف كان يراقب الحوار من مكانه .. هو كان بيعزم راجس على الاكل بعد لحظات بس جيت ذي السيارة هيا الا خربت اللحظة .. وظل رافع حاجبه وهو يشوف كيف راجس يتكلم بكل اريحية ويظل يمسك يد الغريب الا قدامه وواضح انو علاقتهم مرة قريبة !

راجس انتبه لسياف فالتفت يطالعه
- شكرا حضرت المحامي .. ما بعطلك اكثر من كذا

جولان رفع عيونه لسياف وتحرك يقرب من سياف ويمد يده له
- اهلا .. شكرا لكل شي بتسويه لراجس .. انا متأكد انو بأيدي امينة معاك

سياف طالع بيد جولان وبعدها طالع فيه بشكل كامل قبل ما يد يده بهدوء ويضغط على يد جولان بالقوة
- ما بسوي الا واجبي

راجس قرب منهم وسحب يد جولان عشان يمسكها هو
- بتعزمني ولا اعزمك اليوم ؟

جولان التفت لراجس بسرعة
- الا يريحك ! .. لك نفس تدفع ولا بتسيبني ادلعك ؟!

راجس رفع عيونه يفكر لما سياف تكلم
- في مطعم قريب من هنا .. اقدر اعزمكم عليه ونتعرف بشكل افضل

جولان التفت لسياف وتكلم
- اوه لا .. يعني شكرا بس ما بنثقل عليك

بس سياف كانت عيونه على راجس الا حضن يد جولان وهو يطالع بسياف
- جد شكرا سياف .. بس ما يحتاج