راجس

87

راجس سحب شنطته وهو يتلفت .. كل الانوار مقفلة وواضح انو رازي ونواف نايم

نزل الدرج وهو شايل شنطته

نزل الدرج وهو يطالع بالوقت ويتلفت حوله

بلع ريقه لما وصل لباب البيت .. فتح الباب للمرة الاخيرة .. هو ما بيرجع لهنا .. ممكن يحتفظ بالمفتاح كمجرد ذكرى بس هو ما بيرجع هنا ابدا ..

ألتفت يطالع البيت للمرة الاخيرة .. للان الصورة المعلقة فيها رازي وراشد وسياف ..

نزل راجس عيونه .. ذا هو الافضل للكل .. انو يبعد ويرجعوا لحياتهم الحلوة هو الاحسن .. كان ضيف على ذي الصورة ومو لازم يفرقهم وهو خارج منها .. على الاقل كذا بيكون ضامن انو كلهم بخير ..

قفل الباب وراه وتنهد .. خرج من الحوش للشارع وطالع بالطرق والانوار الا فيها .. ابتسم بشويش .. ومسك شنطته وسحبها وراه وحط سماعاته في اذنه وبدأ يمشي

اغنية " انا نجم - أمير عيد "

⚜️⚜️⚜️⚜️⚜️⚜️

سياف مسك جواله يطالع فس محادثاته هو وراجس ..
- انا اسف ..
- راجس خلينا نتكلم
- حبيبي .. ارجوك
- تكفى

كلها رسايل قصيرة وعابرة .. هو يبغى راجس يكلمه عشان يطلع الا بقلبه كامل .. هو غبي .. اخذه لمكان مميز عشان يفرض سلطته ؟! .. عشان يوريه انو شوف ذا المستقبل الحلو الا بنعيشه سوا لو قلتلي كل شي .. ولو كان راجس شخص سيء أيش يعني ؟! .. مو الحب يغير ؟ .. فليش ما يصير شخص افضل دحين مع سياف ؟!

حتى لو في شي غلط بماضيه ومال حب سياف في ذا الموضوع ! .. اخطاء الماضي مغفورة في عيونه .. بس يرجعله ..

غمض عيونه وهو يقفل الجوال .. راجس ما قرأ رسايل سياف .. بس هو ما سواله بلوك .. الرسايل جالسة توصل حسب العلامات الا بتظهر عند سياف .. يعني راجس ما قفل باب الكلام بيناتهم .. يعني لسه عنده فرصة

تمدد فوق السرير قبل ما يطالع في دولاب ملابسه .. ظل يفكر قبل ما يطالع في الساعة .. راجس يمشي لما ما يقدر ينام .. فهل قدر ينام اليوم ؟ .. يمكن لو خرج سياف دحين بيشوفه يمشي حول البيت .. يمكن وقتها يقدر يتكلموا بهدوء .. ويرجع كل شي زي ما كان ..

ويمكن ياخ كف من رازي لانو بكى راجس .. بس هو مستعد .. بيتحمل عصبية رازي وفصلته هو وراشد .. بس ما يبغى يفقده

وقف وتحرك للدولاب .. غير ملابسه واخذ نفس عميق قبل ما يطلع من البيت يدور راجس في الشوارع لعله يلقها

⚜️⚜️⚜️⚜️⚜️

مالك طالع في جولان الا كان متمدد ويده فوق عيونه .. ليش ما رجع الشقة ؟ .. مو المفروض يقول اوه اهل حبيبه معاه فليش انام هنا ؟ ..

حسب كلام سادن علاقتهم مو قديمة عشان نقول انو يعرف سند او يهتم بيه اكثر مننا .. فكل تصرفات جولان مو مفهومة بعيون مالك .. ومالك ما يحب الحاجات الا ما يفهمها ..