راجس

43

وقف راجس قدام المرايا يطالع شكله قبل ما يسحب العطر ويتعطر .. بعدها سحب شنطته وحطها على ظهره .. ذا اول يوم دوام بمكان مختلف .. كل الا بيدعي بيه هو انو ما يصير شي اليوم .. يبغى يوم دوام لطيف فقط .. يكفي الفجعة الا اكلها من دوامه في السفارة !

تحرك للباب وفتح باب غرفته وطالع بباب غرفة رازي المقفل .. هو استغرب انو رازي ما صحي للان رغم انو عادة اول من يصحى .. رجع رازي يطالع الساعة .. بعدها تحرك لغرفة رازي .. دق الباب قبل ما يفتحه وشاف شخص واقف فوق سرير رازي فعقد حواجبه وكان بيزعق بس ذاك الشخص فز بسرعة وحس راجس بيد على فمه من وراه فما قدر يزعق

رازي همس في اذن راجس
- اهدأ .. ذا نواف ! .. حبيبي ..

راجس بعد يد رازي عن فمه بعد ما هدأ لانو استوعب الا سكته كان اخوه مو شخص مختلف والتفت على نواف الا واضح انو متوتر وفعليا مو عارف كيف المفروض يتكلم ..

راجس رجع طالع في رازي .. العلامة في رقبته خلته يفهم ويضحك
- مهربه من راشد ؟!

رازي هز راسه وهو يعض شفايفه
- لو شافه ما اعرف ايش بتكون ردت فعله

راجس التفت لنواف وابتسم ولوح بيده
- اهلا .. انا راجس

ما انتظر رد نواف ولف على رازي
- بنزل اكلم راشد واشغله .. شادي لسه في غرفة راشد .. أعطيني كذا ٣ دقايق واذا سمعتنا نتكلم عن الكورة انزل .. تمام ؟!

رازي هز راسه
- تمام

وتحرك راجس برة الغرفة بينما نواف رجع جلس على السرير ويده على قلبه
- بغيت انجلط

رازي ضحك وراح جلس جنب نواف وحاول وجه نواف بيدينه
- على ساس الا صار امس ما يستاهل تتهرب عشانه ؟!

نواف عض شفايفه وهو يطالع رازي
- لا تخليني اتهور دحين ! .. ورانا دوام .. وما ابغاك تتعب

رازي ابتسم وباس شفايف نواف
- أحبك

بعدها تحرك من فوق السرير وفتح باب غرفته وهو يحاول يسمع كلام راجس وراشد عشان يعرف يخرج حبيبه من هنا

نواف مشي ووقف ورى رازي .. لف يده على وسط رازي وهو يسمع معاه قبل ما يرجع لورى عشان باب الغرفة الثانية انفتح

رازي طالع بالغرفة الثانية بتوتر وهو يرد الباب عشان يخبي نواف

وشادي خرج من الغرفة وابتسم وهو يشوف رازي
- صباح الخير

رازي بلع ريقه بتوتر
- ص .. صباح الخير .. معليش لو .. صحيناك

شادي هز راسه بشويش
- جلستي الصباح اليوم فراشد بينتظرني تحت

رازي حط يده فوق يد نواف الا كانت على بطنه
- بتخرج ؟ .. انت وراشد ؟

شادي هز راسه
- قلتله وصلني وروح الدوام .. بس اعتقد انك عارف راشد وحركاته !