راجس

47

كان جالس فوق السرير ضامم نفسه .. في شاش على يده اليسار وهيا توجعه ..

سمع الباب ينفتح فرفع راسه يطالع في عادل الا تنهد وهو شايل كيس رماه على السرير قدام راجس
- ايش سويت ذي المرة ؟

راجس ما تحرك
- المفروض ما تكلمني .. روح قبل ما تشوفك

عادل اخذ نفس عميق وهو يجلس على السرير
- شفتها قلبت وجهها فعطيتها بطاقتي تطلع الصالون .. فيعني كل ماله دينك بيصير اكبر ترى !

راجس كشر وخبى وجهه

عادل طالع في الشاش
- ايش سويت ذي المرة ؟

راجس ما رفع راسه
- ما خلتني اروح الحفلة باخر لحظة

عادل
- يمكن لانها تخاف عليك ؟

راجس رفع راسه يطالع في عادل
- بذمتك انت مقتنع بذي الكلمتين ؟!

عادل ضحك
- لا انا اسف .. طبعا تعذرت بأنك سويت شي غبي يستاهل تتعاقب عشانه .. ايش كان ؟ .. نسيت تطلع القمامة ؟ .. سيبت دراجتك مرمية قدام البيت ؟ .. ولا لخبطت الغسيل ؟!

راجس نزل عيونه وهو يكتم دموعه
- امنية نسيت تحل واجب الرياضيات .. هيا كذبت علي وقالت انو الكتاب مع الاستاذ بس ..

عادل طبطب على كتف راجس
- وطبعا طاح غلطها على راسك .. انو انت المهمل الا ما تنتبه لاختك وانت مو معتبرها اختك وتكرهها وهيا اخذت منك الدلع ؟

راجس هز راسه ومسح عيونه عشان دموعه لا تنزل
- نفس الاسطوانة كأني انا الا خلفتها مو انتم !

عادل مسح على راس راجس
- انت عارف طبع امك .. وتعرف اني مقدر اتدخل

راجس طالع في عادل
- عشان لا تصير ضحيتها الثانية ..

سكت راجس شوي
- ابغى ارجع .. لأخواني

عادل طالع فيه
- انت مو غباء انك ترجع

راجس رفع عيونه يطالع عادل
- اذا بتعاملني كذا فالافضل ارجع

عادل هز كتفه
- وتفقد كل فرصك هنا ؟ .. انت عارف هما كيف عايشين .. راتب راشد ما بيكفي شي ورازي لساته بالجامعة .. تبغى تزيد همها بشخص زايد يحتاجوا يوفروله معيشة معاهم ؟ .. كمان راجس .. طالع حولك .. كل شي بغرفتك اغلى من الحاجات الا عندهم ..

راجس كشر
- بس هما ما بيسوا فيا كذا ! .. ما بيقطعوني عن الدنيا بس عشانهم زعلانين مني ! .. ما بيتجاهلوني وما يخلو اي احد يكلمني ولا يحسبوا حسابي لا في اكل ولا في خروج بس عشانهم متضايقين مني ! .. هما ما بيسحبوا علي وينسوا يجيبوني من تدريب النادي او يبطلوا يحضروا مبارياتي لمجرد منهم زعلانين مني ! .. محد بيسوي فيا كذا غيرها !

عادل
- انت اذكى من انك تروح .. ذا كل الا بقولك هو .. هناك مالك مستقبل او ملجئ .. هنا .. بتتحملها شويتين إلين تخلص الجامعة بعدها بتكسب حريتك ومبلغ يريحك في حياتك بعدين ..