راجس

38

سند فتح عيونه لما دق جواله .. مد يده بهدوء وقفل المنبه ..

طالع جنب المرتبة وشاف دولاب صغير جمب دولاب ملابسه .. ضحك بسخرية وهو يفكر اوه دولابه صار عنده ولد !

غمض عيونه ورجع وجهه ناحيت السقف قبل ما يستوعب .. دولابه جنبه دولاب ثاني !

رفع راسه يطالع الغرفة .. فيها كذا قطعة مركبة .. التسريحة تركبت مع الكرسي .. الدولاب الصغير الا كان طاولة عشان تنحط جمب السرير ..

تحرك ووقف من فوق المرتبة وتحرك للصالة .. التلفزيون خرج من كرتونه وكان محطوط مكانه ومفتوح ..

وقدام الكنبة كان في طاولة كمان تركبت .. كل الاثاث الا كان مخليه بكراتيه كان مفتوح ! ..

قرب من الكنبة وشاف جولان نايم فوقها وهو جالس وبيده كتاب تعلمات لتركيب الجزامة الا قطعها كانت حولين الكنب .. جولان ما نام وقضى الليل يركب كل الاثاث تقريبا إلين غلبه النوم

سند عض شفايفه وغطى فمه .. هو ما طلب من جولان .. هو ما يبغى يحول ذا المكان لبيت .. هو عايش هنا لانو مضطر يعيش فقط .. بس قلبه دق وهو يطالع القطع .. متى اخر مرة حاول فيها شخص يسويله اي شي بدون ما يطلبه ؟ ..

حاول يتذكر .. بس فعليا .. هو دايما لازم يطلب الشي الا يبغاه لانو ما بيجيه بدون طلب ..

غطى عيونه وهو يرجع ويتكي على الجدار يطالع الصالة .. هو عايش هنا من سنتين .. كل القطع ذي بكراتينها من سنتين .. لما نواف حاول يركبها هو زعق عليه .. ونواف ما بيضغط على سند بأي شكل .. هو اكثر من يفهم حالة سند .. بس جولان .. الا سواه .. لطيف ؟ .. يمكن .. سند بطل يعرف يفهم احساسه عشان يفسر كل شي

بعد يده عة وجهه وابتسم بهدوء .. قرب ناحيت الكنبة ونزل وباس جبين جولان وهمس
- شكرا

بعدها وقف وتحرك ناحيت المطبخ .. يحتاج يشكره او يعبر عن الشي الا بيحس بيه ..

⚜️⚜️⚜️⚜️

نواف ابتسم وهو يعدل شماخه .. بيشوف رازي اليوم بالدوام .. طبعا مافي شي يحمسه لدوامه قد رازي فسحب العطر وبخ منه قبل ما يسحب شنطته ويطالع في نفسه بالمرايا للمرة الاخيرة قبل ما يتحرك برة غرفته

تحرك ناحيت غرفة سند وجولان عشان يسلم على سند زي العادة بس غرفتهم كانت فاضية .. هز كتفه وهو يتوقع انو غالبا سند سحب جولان معاه لمكان ما عشان يشوفوا شروق الشمس

نزل الدرج ناحيت الصالة وسلم على راس جدته قبل ما يقولها انو خارج .. بس عند الباب هو شافه ووقف للحظة

ثامر ابتسم لما شاف نواف
- اهلااااا نواف

نواف انمسحت ابتسامته وطالع في ثامر بعيون حادة
- ايش الا جابك ؟!

ثامر عقد حواجبه وهو يبتسم
- تؤ تؤ تؤ .. نواف وزير التسامح وسفير الاخلاق الحسنة كيف كذا تتكلم مع ولد عمك ؟!