راجس

40

طلال ضحك وهو يشوف وجه راجس وهو مكشر
- ايش سوالك سياف ؟

راجس عدل ملامحه .. هو ما تعود على طلال فلسه يستحي منه بعدين ايش يقوله ؟! .. طلبت بوسة من اخوك وما اعطاني ؟! ولا عضني بدل ما يبوسني ؟ .. بأي وجه اصلا يتكلم .. وهو الغلطان .. ما كان المفروض يقولها .. كان بيمزح رغم انو ما بيمانع لو سواها سياف يعني .. بس هو كان يمزح وواضح انو كان يمزح ! بس سياف زفت وخلاص

طلال شاف سكوت راجس فأبتسم وقفل الملف الا كان قدامه وتحرك من مكتب عشان يجلس على الكرسي الا قدام راجس
- تعال .. اجلس وخلينا نتكلم

راجس هز راسه
- انت مشغول وانا اصلا جيت هنا غلط فالاحسن ارجع البيت

طلال
- ايش عندك بالبيت ؟! .. في لعبة بتختمها بالسوني مثلا ؟!

راجس ابتسم بشويش
- لا بس بجلس ارتب كم حاجة وكذا

طلال عقد حواجبه
- يعني ما عندك شي .. اجلس خلينا نسولف .. ذيك المرة قاطعنا راشد .. خليني اكلمك واعطيك شوي من خبرتي .. مو عشاني كبير او عجوز مثلا بس تراني ما اودي بدهيه زي اخوك

راجس ضحك
- راشد ما يودي في دهيه هو بس خواف حبتين

طلال ابتسم
- بالزبط .. وذا عيب راشد .. مو عيب عيب بس .. لو عشت بدون ما تغامر وتغلط بتظل في حدود عمرك ما بتتجاوزها وذا غلط ..

راجس هز راسه وهو يجلس
- بس الخوف هو غريزة البقاء .. وهو الشي الا يبعدك عن كل خطر

طلال
- ممكن .. بس عقلنا مبرمج على الخوف .. احنا نخاف من المجهول .. من الجديد .. من المختلف .. رغم انو عادي المختلف شخص جديد بحياتنا .. والجديد نكهة ايس كريم نشوقها للمرة الاولى .. والمجهول هو مصير طول عمرنا نحلم بيه

راجس مد شفايفه يفكر
- ممكن ..

طلال كمل
- على فكرة انا ما بقولك لا تخاف من الموت او من حيوان مفترس .. بس لا تعيش وانت حذر من كل شي وكل كائن كانك موسوس .. خليك نبيه بس عادي تكون مستهتر احيانا .. الغلط مو عيب واحنا مو ملائكة عشان ما نغلط .. احنا نتعلم لما نغلط ..

راجس نزل عيونه ليده .. هو مو مرة مقتنع .. الغلط بيبقى غلط .. الغلط يعني انت ما فهمت ولا انجزت صح .. الغلط يعني انت ما سويت الا عليك عشان كذا طحت بالغلط .. الغلط يعني انت شخص غير مؤهل .. الغلط يعني انك ما تعلمت ولا أتقنت شغلك ..

طلال اخذ نفس عميق بعدها مد يده لمجسم الميزان الا كان فوق مكتبه والا كان ميزان بكفتين وبينهم عامود مستقيم تحطه على القاعدة وتقدر تلعب في الاثقال عشان توزنها وتغير الوضع

شال العود مع الكفتين وطالع في راجس
- امسكه

راجس سحب العود والكفتين ومسكه قرب النص بشكل لا ارادي فابتسم طلال
- الميزان كيف يتوازن ؟!