راجس

49

راجس دق الباب قبل ما يدخل واستغرب انو سياف مو بالغرفة وتركي كان جالس لوحده فوق السرير

ابتسم تركي بشويش لسياف واشرله يجي يجلس جنبه
- تعبتك معانا انا وسياف

راجس جلس ومسك يد تركي
- مو قلتلي اننا عيلة ؟ فمتى الانسان يتعب من اهله ؟

تركي مد يده عشان يعدل جلسته وراجس ساعده عشان يجلس

طالع تركي في راجس
- عادل ما كان غلطان فيك .. بديت افهم ليش كان يبغى ينسبك له

راجس عقد حواجبه
- ايش ؟

تركي
- عادل كلمني .. مو من ٦ سنين .. قضية انك تتنسب له كان يبغاها من سنين .. من لما كنت صغير .. انا رفضت وقلتله انو بيصير طعن فيها بكرة النهار من اهله .. وكنت صادق

راجس عقد حواجبه
- بس انا مو ولده

تركي هز راسه
- بس هو ما كان يشوفك غير ولده ..

راجس عض شفايفه وتركي كمل
- لما وصاني على اخوانك قالي يكفي اخذت واحد منهم .. فعلى الاقل دبرلهم عيلة يقدروا يلجؤ لها .. اعترفلك كانوا صعبين .. رازي وراشد .. انا بنفسي وصلت لمرحلة كنت ابغى اسحب على كل شي .. بس هو كان دايما يقولي انهم محتاجين اهل .. ويعني .. هما عيالي اليوم

راجس طالع في تركي وابتسم
- بابا عادل ؟ .. باب هو الا قالك ؟!

تركي هز راسه وهو يحط يده على كتف راجس
- ايوة .. تخيل عشانك كنت عنده وعشان لا تضيع هو كان مستعد ينقذ اخوانك .. بس عشان لما الدنيا تحدك وترجع لهنا .. ما ترجع كأنك لقيط مالك اهل .. ولا ترجع وتشوف الكل ضايع ..

راجس هز راسه
- كنت اقوله ابغى ارجع .. كثير .. بس هو كان يقولي انو لأ

تركي ضحك
- لانو ما يبغاك تشوف عيوبهم .. راجس لو في شي بتتعلمه مع الحياة فهو المسافة .. لما تترك مسافة بينك وبين شخص فأنت بتحافظ علة مشاعرك ناحيته .. لما المسافة ذي تروح وتصير عايش مع ذاك الشخص .. بتبدأ تستوعب كل شي عن الطرف الثاني .. وصدقني .. محد مثالي عشان تبقى تحبه بعد ما تعيش معاه .. العكس .. بذات وانت لسه صغير .. بتكرههم ولا بتعطيهم فرصة يفهموك او تفهمهم .. 

راجس ابتسم
- يعني دحين جاتني الفرصة ؟!

تركي
- المشاكل والمصايب تقرب الناس .. الا صارلك خلاك اقرب لهم .. وصدقني .. لو انك راجع بظروف عادية كان عمرك ما بتعرف تقرب منهم زي ما انت قريب الان

راجس ميل راسه
- يمكن

تركي طبطب على ظهر راجس
- ولا كنت بعرفك وتصير قريب مني ومن عيالي .. فيعني .. موتت عادل جات بفايدة !

راجس ضحك بشويش وهو يهز راسه

⚜️⚜️⚜️⚜️⚜️

🔴 تحذير الين نص البارت 🔴