مرهف عقد حواجبه وهو يشوف مكتب نواف مقفل .. ليش ما داوم للان ؟
ألتفت لما سمع الشباب يتكلموا وراه
- معقولة اخوه ؟!
دق قلبه بالقوة بس حافظ على ابتسامته وهو يقرب منهم
- السلام عليكم
ألتفتوا وكانوا بيردوا السلام بس واحد منهم نط وتكلم
- استاذ مرهف شفت تويتر ؟
مرهف هز راسه
- مالي في السوشيال ميديا .. ليش ايش الترند ذي المرة ؟!
الموظف تكلم
- في قضية قديمة رجعت للنور .. قضية قاتل متسلسل
نط واحد ثاني وقاطعه
- سفاح مو بس قاتل متسلسل !
مرهف طالع فيهم باستغراب وواحد تكلم
- يقولو انو يقرب لاستاذ نواف و ..
فجأة حس مرهف بقلبه يدق بالقوة .. هل يحتاج يدافع ؟ .. بيخرب سمعته بيناتهم .. لو .. لو انعرف انو القاتل اخو نواف .. الكل بيقول انو مرهف سيء زيه لانو دافع عنه .. لا ما ينفع .. ما ينفع يخسر تأييد الكل له عشان نواف .. ما ينفع يخسر سمعته ويدافع عن نواف لانو فعلا ذا اخوه ..
قرب واحد من الموظفين من مرهف
- ادري الموضوع يصدم بس شوف .. مرة مرة يشبه استاذ نواف ! .. واسمه نفس الاسم .. يعني هما اخوان او عيال عم على الاقل
مرهف طالع بالصورة .. هو جالس يخبي رجفته الداخلية وهو يطالع الصورة .. يقدر يقولهم انو مستحيل .. يقدر ينفي الموضوع .. بس بعدين لو جا نواف وقالهم ايوة ذاك اخوي .. وقتها كيف بيكون شكلك قدامهم مرهف ؟!
رفع مرهف عيونه يطالعهم وشافهم يطالعوا فيه .. كأنهم ينتظروا منه كلمة .. كأنه كلمته بتحدد لو هو منهم او شخص غريب .. نبضات قلبه زادت وهو يطالعهم .. بينحط في نفس المكان مرة ثانية .. ذكريات سيئة بدأت ترجع لعقله وتحسسه انو مستعد ينهار
بس هو ضغط بيده على الجوال وابتسم بهدوء
- ممكن .. صراحة ما دققت النظر في وجه استاذ نواف عشان اعرف .. بس مسكين .. الا عنده صلة قرابة بشخص زي ذا وسفاح فالله يعينه
بعدها ترك الجوال وتحرك لمكتبه وتركهم يتكلموا .. رفع يده لصدره .. كذا نواف خارج حدوده تماما .. هو ما بيلحق شخص عليه سمعة .. ما بيخاطر يصير منبوذ
⚜️⚜️⚜️⚜️⚜️⚜️
راجس كان واقف قرب البوابة وواضح انو متضايق .. هو يبغى يرجع جدة الان الان ! .. بس ما ينفع يسحبوا على المعرض .. هو يدري انو سياف عنده شغل عشان كذا هو بيحاول يصبر نفسه قد ما يقدر
رفع يده يعض اظافره بعدين تركها .. هو وعد نفسه يبطل ياكل اظافره لما يتوتر كذا
غمض عيونه واخذ نفس عميق
- واضح الصدف جالسة تجمعنا ذي اليومين استاذ راجس
فتح راجس عيونه وألتفت وشاف حامد الا تحرك ووقف قدامه
أنت تقرأ
راجس
General Fictionيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
