شادي مسح على اكتافه وهو يحس بشوية برد
راشد عقد حواجبه وهو يطالع اعدادات مكيف السيارة
- بردان ؟ .. اخففه ؟!
شادي غمض عيونه وهز راسه بشويش
- شوي ..
راشد ضغط على اعدادات مقعدة شادي وشغل الدفاية رغم انو مو مقتنع انو السيارة باردة .. مو بذا الشمس ! .. بس كل ما يطالع في شادي هو يشوفه بيرجف
راشد بلل شفايفه
- بنروح فندق دحين اصلا .. عشان نريح ونرجع نخرج بعدين
شادي حط راسه على القزاز وهو يحضن نفسه
- طيب
راشد ابتسم لانو شادي ما رفض وتحرك للفندق .. لمجرد ما وقف بالمواقف هو فتح التطبيق وحجز غرفة .. ما يبغى يطول في الكلام مع الموظف فيفضل يسوي كل شي اون لاين
التفت لشادي وكان بيتكلم بس شافه مغمض عيونه وهو نايم .. راشد مد يده وحطها على جبين شادي .. حرارة جسمه عادي .. بس واضح انو للان يرجف من البرد .. يمكن صخونة داخلية ؟!
راشد طالع بالمواقف واخذ نفس عميق .. خرج من السيارة وقفل البيبان عشان لحد يأذي شادي وهو نايم .. صح الفندق محترم وفيه حارس بس هو ما يبغى يخاطر
تحرك للاستقبال واخذ بطاقة الغرفة ورجع للسيارة .. طالع بشادي وبعدها بالمواقف .. مافي ناس كثير هنا .. بيقدر يشيله ومحد بيسأل .. صح ؟
فتح الباب وهز شادي
- هييييي .. يا ...
راشد وقف للحظة .. هو ما يعرف اسمه .. شادي يعرف اسم راشد بس راشد عمره ما سأل عن اسمه ! .. هو بينام ويطلع ويرجع مع شخص ما يعرف اسمه حتى !
بس مو كذا اسهل ؟ .. اول مرة تقابلوا لما حاول شادي يعرف عن اسمه راشد قاطعه وقاله مافي شي مهم بيناتهم .. لا اسم ولا عمر طالما هو مو قاصر ولا شغل ولا جنسية .. الا بيفرق معاه بس انو الطرف الثاني ما عنده اي امراض .. ورغم انو يتذكر نظرة السخرية في وجه شادي وهو يجاول اسألة راشد الا انو ما استنكرها .. يعرف انو قواعده ما تعجب ناس كثير بس هو مرتاح بيها .. إلين تصير تبغى تصحي الطرف الا ما تعرف اسمه
هز راشد جسم شادي بشويش
- اصحى .. بنطلع تنام فوق
شادي تحرك بانزعاج وهو يمسح وجهه فراشد طفى السيارة وتحرك لباب شادي وفتحله الباب .. مد يده وشادي مسكها وبدأ يمشي معاه بدون ما يتكلم وواضح النوم مسيطر على شادي
راشد بلل شفايفه في المصعد وهما طالعين واول ما فتح باب المصعد رجع سكت .. يبغى يسأل بس مو عارف كيف يقوله اسمع ايش اسمك ! .. السؤال غبي جدا
تحرك وفتح باب الغرفة وشادي رما نفسه على السرير بعد ما فصخ جزمته ورماها بشكل عشوائي
راشد جلس جنب شادي ومسح على راس شادي الا خبى وجهه بالمخدة وهو مغمض عيونه
أنت تقرأ
راجس
General Fictionيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
