جولان ضحك وهو يشرب قهوته ويسوق
- حلو يعني عندهم جمعة كذا زي تبع الافلام ؟!
راجس ضحك وهو ياكل الحلا
- اييييه كأنهم محتفلين بالكريسمس بس كذا كل جمعة .. كمية الناس بالمجلس تخوف من كثرهم احسب الناس ما تتجمع الا العيد اتاري راشد ورازي يتجمعوا من ذولاك كل اسبوع !
جولان ابتسم وطالع براجس
- وعجبتك جلستهم ؟!
راجس قام يقلب في الحلا
- والله شف .. يعني .. تمنيتك معاي فيها .. حسيت لو انك هناك معاي بقدر استمتع اكثر
جولان نزل القهوة بهدوء
- ماني ملاكك الحارس راجس !
راجس رفع راسه يطالع بجولان
- ياخي اكذب شويتين وخليني اعيش الجو ؟!
جولان ضحك
- ما تفرغ عواطفك فيا ! .. دورلك حبيب معضل !
راجس عقد حواجبه
- ايش معنى ؟!
جولان طالع راجس بطرف عيونه وهو للان مبتسم
- عشان يخوف اخوانك منك ! .. و .. عشاني عارف انك بتجلس تلمس عضلاته طوال ما هو نايم فتعرف .. كأنه ميني قيم تسويه إلين تنام !
راجس قلب عيونه وهو يضحك ورجع ياكل الحلا
جولان فتح الراديو وشغل وحدة من اغانيهم ( سقف - رامي جمال )
وصاروا يغنوا هما الاثنين باصواتهم معاه وهما يضحكوا
جولان رخى الصوت شوي لما شاف التفتيش قدامهم وراجس اعترض
- ليشششششش
جولان ضحك
- عشان لا ننام بالتوقيف !
راجس قلب عيونه ورجع عدل جلسته
- ما بننام بالتوقيف من اغنية ! .. ولا بنصير اتفه مجرمين على وجه الارض !
جولان كتم ضحكته عشان قرب من العسكري الا اشرله يوقف .. نزل جولان القزاز والعسكري طالع فيه وفي راجس قبل ما يقولهم
- هوياتكم
جولان سحب محفظته وطلع هويته وراجس سحبها من كفر جواله لانو يحطها ورى الكفر عشان لا ينساها
طالع العسكري فيها قبل ما يأشر لجولان يوقف على جنب
جولان استغرب وتحرك بالسيارة بينما العسكري رفع جهازه يكلم المركز
- لقيناهم
راجس عض شفايفه وهو يشوف جولان يوقف السيارة
- شكلي دعيت علينا بالغلط ثاني !
جولان رفع حاجبه
- لأ .. اكيد ملخبطين او شكلي نسيت أولع الانوار او شي .. او يمكن مشبهين على السيارة
راجس هز راسه بشويش وجولان فتح باب السيارة
- خليك هنا بكلمه وارجعلك طيب ؟
راجس رجع ظهره للمعقد ورجع ياكل الحلا
- اوك
جولان خرج يكلم العسكري بس تفاجأ لما العسكري مسكه وسحبه ناحيت البوكس بعد ما حط بيده الكلبشات وهو يتكلم
- عليكم بلاغ سرقة وبلاغ خطف وبتنام الليلة بالقسم
أنت تقرأ
راجس
General Fictionيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
