راجس

10

رازي طالع بجواله .. كانت في رسالة اعتذار ثانية من جولان ..

رجع حط يده فوق صدره .. لو ما تحرك راجس بنومه .. هل كان حيبوسه ؟!

رفع يده بشويش لشفايفه .. هو ؟ .. ينحب ؟! .. شخص يبغى يقرب منه .. شخص يبغى يبوسه ؟ ..

غمض عيونه بشويش مرة ثانية وهو يسمع نفس الاصوات تنعاد في عقله " دب .. خنزير .. شكلك يجيب المرض .. انتبه لا تاكلنا .. انت تاكل بدل اخوانك ؟ .. لا تعزمه ترى حتى الطبق ممكن ياكله .. شايف شكلك ؟! .. وع .. "

لف جسمه للناحية الثانية وغطى اذنه بالمخدة .. احساس الغثيان رجع .. غطى فمه بيده قبل ما يقوم من فوق السرير ويجري للحمام .. يدري انو ما بيستفرغ .. ما يقدر يستفرغ لو ما ارغم نفسه

رفع يده بشويش وهو يشوفها ترجف .. يحس بجسمه يرجف .. يحتاج يستفرغ .. الا اكله بيخليه يرجع هناك .. يرجع لذاك الجسم الا الكل كان يضحك عليه ..

غمض عيونه وهو يدخل اصابعه في فمه ويلمس حلقه .. هو يحتاج يستفرغ .. لازم يستفرغ ..

⚜️⚜️⚜️⚜️⚜️

تحرك مرهف بانزعاج فوق السرير وهو يطالع جواله .. الساعة ٦ الفجر مين يدق عليه ذا الوقت ؟!

طالع بالرقم واستغرب انو سياف ففز من ورفع جسمه .. سياف ما يتصل بذا الوقت بالعادة .. في شي حصل ؟!

رفع السماعة وتكلم بقلق
- الو ؟

سياف
- افتح الباب

مرهف عقد حواجبه
- هاه ؟!

سياف تكلم
- افتح باب غرفتك يلا

مرهف مسح عيونه
- تمزح ؟! .. شايف الوقت ؟!

مرهف تحرك للدولاب تبع الفندق وسحب الروب لانو ما حيفتح باب غرفته وهو ببجامته طبعا !

تحرك للباب وهو يكلم سياف
- اوك اهوه فكيت البا ..

ما كمل كلامه لانو جواله طاح من يده لما شاف سياف واقف برة الغرفة

مرهف ظل واقف مو عارف يتصرف .. اول مرة يسويها سياف وانو يشوفه كان شي غريب ! .. احساس مو قادر يفهمه .. ما يدري هو مبسوط انو حبيبه قدامه ؟ .. ولا زعلان انو ما جاله الا بيوم سفرته !

سياف دخل الغرفة وقفل الباب وراه ولف يده حولين وسط مرهف وقربه له وباس شفايفه وهو يدفه على جوة .. مرهف تمسك في سياف وهو يلف يدينه حولين رقبته ويكمل البوسة ..

تحرك سياف لجوة الغرفة ونزل مرهف فوق السرير وللان مرهف متعلق برقبته وتكلم وهو يبتسم
- جيت !

سياف هز راسه
- يوسف خلاني احجز لما عرف انك هنا لوحدك

مرهف مسح على خد سياف
- طيب اكذب علي وقول انك جيتني مشتاق ؟

سياف ظل يطالع عيون مرهف ومسك يده الا على خده وباسها
- انا ما انسب شي ليا لنفسي ..

مرهف رجع سحب سياف وباس شفايفه
- احيانا اقول انك احسن وانت ساكت !