راجس

12

جولان ظل يضغط بيده على يد راجس وهما بالاسعاف .. هو بخير حسب كلام المسعف .. بس جروح راجس انفتحت فلازم يروح المستشفى

جولان رفع جواله بيده الثانية .. دق على راشد ١٥ مرة الين قفل راشد جواله .. ودق على رازي ٣ مرات قبل ما رازي يعطيه بلوك ..

مافي احد ثاني يعرف راجس هنا .. لو عادل كان عايش ما كان اي شي من كل ذا صار ..

غمض عيونه ورجع راسه لورى وهو للان رافض يترك يد راجس .. والفكرة الوحيدة بباله .. لو راجس دق على اخوانه بداله .. هل كانوا بيجوا ؟!

⚜️⚜️⚜️⚜️⚜️

على البحر كان رازي واقف متكي على السور وهو يطالع الامواج .. في هوا خفيف كان يحرك خصلات شعره .. وهو مستمتع بالمكان

اصوات الموسيقى الخفيفة مع موج البحر والمكان الا كان هادئ نوع ما لانو الوقت مرة متأخر

قرب نواف ووقف جنب رازي ومدله صحن البليلة
- قلتله ما يحطلك شطة

رازي طالع بالصحن وابتسم
- ما احبها .. بس شكلي بحبها اليوم

نواف التفت يطالع البحر وهو مبتسم .. هما بوسط الناس فما بيقدر يسوي اي حركة غبيى فجالس يحاول يتجنب عيون رازي .. ورغم كذا للان عيونه تطالع رازي وتسترق النظرات له

رازي لف وجهه ناحيت نواف
- ما حكيتني .. عنك

نواف سكت للحظة قبل ما يضحك
- احنا بسنا بعض واحنا لسه ما تعرفنا كويس ؟!

رازي ضحك
- تقريبا

نواف مسح راسه بيده وهو مبتسم
- لما نعرف بعض ايش بنسوي ؟!

رازي عض شفايفه يفكر
- اممم اترك الموضوع للزمن .. لا تستعجل الحياة وعيش كل لحظة

نواف طالع برازي قبل ما يرجع يبعد عيونه للبحر
- الولد الوحيد بين بنتين .. اختي الكبيرة مبتعثة بتدرس برة .. زواجها قريب بس تخلص رسالة الماستر .. اختي الصغيرة لساتها بالثانوي .. اخر سنة ومتوترة كأن محد غيرها بيدخل الجامعة وكأن كل العالم بينهار لو ما دخلت طب .. امي مدرسة متقاعدة .. ابوي عسكري متقاعد فاتح مكتب عقار يطقطق فيه وهو فاضي .. وايه بغيت انسى .. جدتي ما تعيش معانا بس هيا حرفيا جارتنا فكل يوم امرها قبل الدوام وبعد الدوام .. ذا مختصر حياتي

التفت لرازي الا سكت وظل يطالع في البحر .. بعدها تكلم بهدوء
- ابوي انتحر .. لما كان عمري ٩ سنين .. انتحر ليلة العيد .. واحنا نعلق زينة العيد ..

نواف مد يده ومسك يد رازي الا ضغط عليها بشويش
- راشد اكبر مني .. ب٣ سنين .. و راجس .. اخوي الصغير اصغر مني ب٤ سنين .. امي وابوي تطلقوا وعمر راجس سنة .. بعدها تزوجت شخص ثاني .. عادل .. كان زوج ام لطيف .. ما يتدخل .. ما يحاول يكون اي شي .. بس تلقاه بشكل نادر ..