راجس

112

سلطان قفل باب سيارته وطالع بالكباين .. اخوه لو ما عاش بشقة مطلة على البحر مستعد يستأجر فيلا بفوق ال١٢٠ ألف بس عشان يزل قدام البحر

ضحك بسخرية .. طبيعي يدور البحر .. مافي شي بيخبي خطايا سامي غير البحر

تحرك لمدخل الفيلا .. هو الوحيد الا مو مسموحله يدخل سيارته .. يمكن لانو اخوه حيوان .. الكل يدخل ويستعرض بسياراته الا سلطان .. لازم يدخلها وهو يمشي لانو لو ايش ما صار عمره ما بيوصل لمكانة احد من الا جوة

اخذ نفس عميق وهو يعدل ثوبه .. سامي قاله يجي بأي لبس .. بس هو يعرف حركات سامي .. فيفضل يكون رسمي حتى لو كانت مجرد زيارة عادية

دق الباب والحارس خرج من غرفته واول ما شافه ابتسم
- اهلا بابا سلطان

سلطان ابتسم وقرب يسلم على الحارس
- اهلا .. سامي جوة ؟

هز الحارس راسه
- ايوة .. وبابا كبير موجود كمان

سلطان عقد حواجبه وطالع في السيارات .. سيارة ابوه مو من ضمنها .. على اساس بيجي من الرياض بسيارته مثلا ؟ اكيد جاي من المطار بأي شي مستأجر

هز راسه وهو يدخل ويبلع ريقه .. ما شافه من سنتين .. ايوة العيد الا فات هو تحجج انو ابو نواف يحتاجه في كم شغله فما يقدر يطلع الرياض .. مو كأن ابوه بيفرق معاه .. هو يدري انو ابوه ما انتبه غالبا لغيابه اصلا

طالع بالكيس الا بيده .. امه علمته ما يدخل مكان بدون شي في يده .. بس فجأة بدأ يحس انو الا جابه مو كفاية .. هو داخل بيت اغرب عليه من بيت الغريب ..

الحارس حط يده على ظهر سلطان
- يمكن هوا في نوم ..

سلطان ضحك .. حتى الحارس يدري انو سلطان الوحيد الغير مرغوب فيه هنا
- ان شاء الله

فتح الباب ودخل البيت .. طبعا الرخام على الارض .. الزينة على الجدر .. كشر وهو يحس نفسه بينخنق .. كل شي حوله يحسسه بالخنقة ..

تحرك ناحيت المجلس مكان ما كان سامي جالس ببجامة البيت وهو متربع فوق الكنب وابوهم هنا جالس جنبه بملابس البيت وهو يضحك على شي يقوله سامي

لو كان اصغر من كذا كان وقف يطالعهم وهو يحس بشي بداخله يوجعه .. بس هو تقبل حقيقة انو ذا مو مكانه ولو ايش ما صار عمره ما بيكون ذا مكانه فبطل يسأل الحياة ليش 

حط الكيس فوق الطاولة قبل ما يتحرك لأبوه .. مسك يد ابوه يبوسها بعدها باس راسه وألتفت يجلس على ابعد كنبة عنهم

سامي رفع حاجبه يطالع الكيس
- ما بتبطل تشتري حاجات رخيصة ؟ .. لما تاخذ شي لأحد خذ شي بقدر مقام ذا الاحد

سلطان بلل شفايفه وهو يطالع سامي
- الذهب حرام على الرجال ولا كنت جبتلك طقم

سامي قلب عيونه
- لا .. خليه لك .. بتحتاجه وبطلع احلى عليك