راجس

24

سمع جواله يدق ففز من نومه وسحبه .. توقع واحد من اخوانه بس طلعت راسالة من سياف
- الاكل فوق الطاولة .. لما تصحى افطر عشان لا تتعب

نزل جواله وهو يحس بالزعل .. محد منهم اكتشف انو خرج امس .. او يمكن هما مو مهتمين ؟ .. هما مو قريبين من بعض .. يدري انو جزء من ذا الغلط غلطه .. هو ما حاول يتقرب ويتعرف عليهم .. فطبيعي لما يجي دحين ويقولهم امشي نتصرف كأننا اخوان بيكون الوضع غريب .. بس هو تمنى يحس بشوية اهتمام

رجع تمدد فوق السرير وسحب المخدة يحضنها ..

دق على جولان كذا مرة امس .. بس جوال جولان صار مقفل .. كأنه جدة بتاخذ منه كل الا حوله .. اهل ابوه .. اخوانه .. ودحين جولان .. كأنها بتجرده من كل عزيز

غمض عيونه مرة ثانية .. انك تنحوج لشخص ثاني .. يكره ذا الاحساس .. طول عمره وهو يمتلك بيت يرجعله .. تضارب في مراهقته مع امه بس كان جولان موجود وكان دايما يروحله .. بس دحين حتى جولان مشغول مع اهله .. وراجس شارد من ذول الاهل

⚜️⚜️⚜️⚜️⚜️⚜️

رازي سحب كوب القهوة والتفت بيروح لمكتب نواف بس مرهف تحرك بسرعة ودف يد رازي الا رجع خطوة لورى بسرعة ويده مالت شوي فأنكب شوي من القهوة على يده
- اوتش

مرهف رفع راسه وطالع بيد رازي بعدها رجع يطالع في وجهه
- لا تسوي فيها دلوع .. القهوة مو مرة حارة

رازي عقد حواجبه بس هز راسه وتحرك بدون ما يتكلم

مرهف قلب عيونه وهو يطالعه يدخل غرفة نواف .. واضح انو الا بينهم جالس يتطور ..

حس بجواله يهتز فسحبه وشاف رسالة من سامي
- لقيت مطعم فنان نروحه بعد دوامك .. خليك مستعد وبمرك انا بسيارتي

مرهف عقد حواجبه وهو مبتسم
- سيارتك ؟!

سامي رجع كتب
- عندي سيارة ببيت العيلة بس ما احركها الا لما انزل جدة

مرهف كشر
- انت ساكن مع اهلك ؟!

سامي
- لأ شايفني مراهق ؟! .. سيارتي عندهم عشان اخوي يحب يخرج فيها يكشخ

مرهف ابتسم .. حلو يعني مو رجل عائلة زي سياف .. للحظة خاف يكون وقع بنسخة ثانية من سياف !

⚜️⚜️⚜️⚜️⚜️⚜️

راشد تثاوب وهو يطالع الاب قدامه .. يحس انو لسه يبغى ينام رفع جواله يطالع القروب .. راجس ما رسل شي من امس

تحرك ودخل على رقم راجس .. تردد وهو يطالع الرقم .. لو دق ايش بيقول ؟! .. اسف على امس ؟ .. فطرت ؟ عجبك الاكل ؟

يمكن راجس ما يبغى يتكلم .. راشد بيدعي انو يعرف شخصية راجس بس حقيقي هو ما يعرف شي عن راجس الزعلان او المتضايق .. هو ما يعرف الا شخصيته بشكل سطحي .. يعرفه وهو يضحك او يتكلم عن شي يحبه .. هو ما يعرف غير القشور الا حول شخصية راجس ..