راجس

72

جولان غسل الصحون وقفل الموية وألتفت يطالع المطبخ وبعدها الصالة .. مقارنة بأول يوم جا فيه لهنا المكان تغير كثير

صار كأنه بيت اكثر ! .. بس يمكن ناقصه شوية زينة ؟ .. قطع اثاث صغير زي اللوحات او كم زرعة وفازا بما انو الشقة سادا تماما من كل ذا ..

ويمكن حيوان أليف ؟ .. هو يعرف قد ايش الحيوان الأليف ممكن يحسن نفسية الشخص .. بعد وفاة ابوه امه اعطته كلب صغير .. ظل يعيش معاه سنين وظل سنده لفترة طويلة جدا .. وكان حوله وقت وفاة امه .. ويمكن كان حيعيش اطول لو ما ديريك كان شخص سيء وقرر انو يوديه للعيادة ويعطيه حقنة الموت الرحيم عشانه صار كبير بالسن ..

هز راسه بشويش وبعد كل ذيك الذكريات من باله .. هو بيركز على الحاضر دحين مو على الماضي ..

سند مقفل جواله بشكل كامل فمحد قادر يوصله .. جولان ما يعرف كيف ممكن يوصل لعمه ابو سند .. ولا كان حاول يكلمه .. مو دايما وجود الاهل حولك هو الافضل ؟ بس هو يعرف علاقتهم كيف .. سند ما يتكلم عن ابوه كثير

طالع جولان حوله .. حسب كلام سند كل شي هنا ابوه الا دفع فلوسه .. فهل هو جالس يدلل سند لانهم قريبين من بعض ؟ .. ولده الوحيد الا يحبه ؟ .. ولا كل ذا الدلال هو محاولة لقول كلمة اسف ؟

هل أذى سند في الماضي لدرجة انو محتاج يدفع كل ذا ويوفر كل شي لسند بس عشان يريح ضميره ؟

امه وابوه كانوا يدللوه بطفولته عشانه ولدهم الوحيد .. وبعد وفاة ابوه امه صارت تدلعه بشكل كبير عشانه يتيم وفقد ابوه وهو لسه صغير .. بس هو يعرف انو الاثنين كانوا يحبوه من كل قلبهم ومستعدين يسوا اي شي عشانه فما بيقول انو دلاله كان اعتذار .. بس لما يطالع في سند .. وضعه مختلف تماما

حسب كلام جدتهم ام سند تخلت عنه بعد ما كمل السنتين .. كملت فترة رضاعته كاملة قبل ما تعطيه لجدته وتروح تتزوج وتعيش حياتها بمكان بعيد .. اما ابوه فهو حرفيا سافر بيوم ولادته .. بالاصح هو خرج من المستشفى بعد ما شاف سند لمرة وحدة قبل ما يتركه ويسافر

فسند عاش عند جدته بدون اي حضور فعلي لأي واحد من الاثنين .. طبعا جدتهم ما قالت ليش ابو سند سافر .. بس حسب كلامها كان يزور سند كل سنة بالعيد .. يجي محمل العاب وهدايا ويقضي ٣ ايام بالزبط .. ٧٢ ساعة بدون اي زيادة .. يقضيهم مع ولده بشكل كامل لدرجة انها تنسى انو سند موجود من كثر ما يكون ابوه متلصق فيه وشايله ..

ظل يسوي كذا إلين صار عمر سند ١٤ سنة .. بعدها صارت مشكلة ومعد صار ابوه يجي ابدا .. وطبعا جولان ما يعرف شي عن المشكلة ذي ..

تحرك جولان ناحيت الغرفة الثانية الا كان فيها المرتبة وطالع في سند الا كان فوق المرتبة متمدد يلعب بالجوال

ابتسم جولان بشويش
- نخرج ؟

سند عقد حواجبه
- ما ينفع اخرج