راجس

42

سياف حط الجوال فوق المكتب وهو يتخذ نفس عميق

لحظات وماهر دخل المكتب وطالع سياف ورفع حاجبه
- خير ؟! .. ما اتذكر سويت يوم مفتوح للمحامين !

سياف طالع في ماهر وماهر تنهد من ملامح سياف وترك الا بيده
- اخلص .. ايش المصيبة الا سويتها ذي المرة ؟!

سياف مسح وجهه بيدينه
- كنت جاي اسألك عن راجس

ماهر رفع حاجبه
- تسأل كمحامي ولا ؟!

سياف هز راسه
- بكل الصفات .. ما بتفرق

ماهر هز اكتافه
- ما بتفرق في اجابتي .. بس بتفرق في عقلك

سياف طالع في ماهر
- قصدك ؟!

ماهر ابتسم
- مو اول مرة تحول عميل انت ماسك قضيته عندي .. بس اول مرة تنام برة في غرفة الانتظار تنتظره ..

سياف نزل عيونه
- ما بيعرف يتحرك لانو حمار بيمشي بدل ما يطلب اوبر

ماهر هز راسه
- ادري .. لان ذا جزء من شخصيته

سياف
- شفت قلتلك هو حمار !

ماهر هز راسه
- هو مو حمار .. هو وحيد

سياف سكت وطالع بماهر الا فتح الملف
- تكلمت معاه .. هو مستحيل يلعب في دماغ احد .. هو انلعب في دماغه كثير وهو صغير .. يلوم نفسه على الحاجات الغلط الا حوله عشان كذا يسكت ويحاول يصلحها بدل ما ينسب الغلط للشخص الثاني .. يعني عادي تشوفه يحاول يصلح شي كسره شخص غيره بدل ما يتركه او يبدله بدون ما يشتكي لاحد او يقول لأحد شي

سياف سكت يفكر .. وماهر كمل
- تعرض للمعاملة الصامته كثير عشان مذا اغلب وقته يشغل شي يسمعه .. هو يعتبر نفسه عالة لو ما قام وسوا شي فصعب تشوفه هادئ او فوق سريره .. هو من النوع الا حتى لو كان تعبان بتشوفه يقوم يخلص اغراضه الين ينهار جسديا ويصير مرغم يجلس على السرير ..

سياف غمض عيونه .. راجس مشي برجوله الين البيت بدل ما يطلب اوبر او يتضارب مع سياف يوصله لانو شاف انو زعله ونرفزته هيا مشكلته الشخصية الا لازم يعاقب نفسه عليها ويمشي للبيت بدل ما يطلب سيارة لانو مايستاهل يرتاح ! .. ولما راح وشافه ينظف هو كان بينظف لانو هو يعتقد انو لو ما سوا شي اضافي بالبيت فهو ماله فايدة ومجرد حمل على اخوانه .. ونفس الشي بالمكتب .. هو طلب من سياف شي يسويه لانو ما بيقدر يجلس فاضي .. ما يقدر يجلس بمكان هادئ .. لانو الهدوء يذكره انو وحيد وانو محد يكلمه او يبغاه ..

ماهر ابتسم وهو يطالع سياف
- اعتقد انو كذا كفاية لانو واضح انك استوعبت انك جالس تسوي حاجات غبية معاه

سياف بلع ريقه وطالع في ماهر
- ومرهف ؟!

ماهر ظل يطالع في سياف
- انت بنفسك قلتها ليا .. انت تحس مرهف زي الألماس .. يلمع ويجذب .. وكل ما تعمقت فيه كل ما اكتشفت انو شخص عادي .. وانو انجذابك له بيصير عادي ..