راجس

79

الساعة ٥ الفجر :

تحرك سياف فوق السرير بازعاج .. بعدها فتح عيونه .. راجس مو في السرير !

رفع راسه يطالع حوله .. ينتظره يرجع من الحمام .. بس لما طول هو تحرك من فوق السرير .. دق باب الحمام وما سمع صوت ففتح الباب بس الحمام كان فاضي ..

تنهد ونزل يمشي وطالع بالصالة والمطبخ .. كل شي مقفل !

عقد حواجبه وتحرك للحوش .. مافي اثر لراجس !

دق قلبه بالقوة والتفت بيدخل البيت وطالع في الغرف .. يمكن طاح او داخ ومحد انتبهله .. يمكن احد تجهم عليه زي ذيك المرة ؟! .. او صارله شي ؟!

ما عرف ايش يسوي وجواله فوق بغرفتهم .. ألتفت ناحيت الجزامة وفتحها بيسحب جزمته بس وقتها انتبه .. جزمة راجس مو موجودة ! .. هو خرج ؟!

سياف ترك جزمته وطلع غرفتهم .. طالع فوق الكميدينو.. جوال راجس مو موجود .. تحرك ناحيت الدولاب .. وشنطة راجس الا يحط فيها محفظته واغراضه لما يخرج موجودة .. فتحها وشيك .. محفظته مو هنا ..

سياف طالع بالساعة .. راجس يخرج يجري في الصباح بس عمره ما خرج الساعة ٤ الفجر !

تحرك سياف ونزل مرة ثانية ولبس جزمته وفتح باب الشارع يطالع في الشوارع حولهم .. الدنيا هادية بشكل كامل ونادر ما تمر سيارة من الشارع الرئيس القريب من البيت بسبب الوقت ..

جدة المدينة التي لا تنام تكون هادية دايما بعد الساعة ٣ .. فكان الهدوء ذا طبيعي .. بس مافي دورية بتسيب واحد يجري الساعة ٤ الفجر بدون ما تشيك لو كان متعاطي شي !

سياف تنهد وهو يرجع ويجلس على درج الحوش يراقب الباب وينتظر راجس يرجع من المكان الا راحه بذا الوقت .. وهو حاسس اصلا بتوتر وجالس يحلف لو راجس ما رجع قبل ٦ الفجر هو بيروح يبلغ انو مفقود !

على الناحية الثانية :

راجس تحرك بالشارع .. لو طالعت فيه من بعيد بتعرف انو حافظ المكان لانو جالس يتحرك بشكل واثق مو بشكل شخص ذي اول مرة يروح فيها لذي الناحية

كان يلتفت بشكل طبيعي كأنه يطالع حوليه بس هو فعليا كان يراقب كل شي حوله .. يتأكد محد وراه

مجرد ما وصل للمكان رفع جواله يسوي نفسه بتكلم بالجوال ولف وجهه يقابل الشارع فترة وهو يتأكد انو محد حوله

قبل ما يرجع خطوتين لورى .. يدف الباب ويدخل بدون محد ينتبهله

المخزن كان ظلام اصلا غير النور الا كان جوة بالنص .. نور كشاف ما بيوصل لأطراف المخزن فأي احد لو بيمر من برة مستحيل ينتبه انو في شي بالداخل

- ايش صار ؟!

وقف راجس ونزل الهودي عن راسه
- راشد يبغاني اتنازل في المحكمة .. وسياف .. تصرفاته .. مختلفة