راجس

97

راجس كان جالس فوق الكرسي .. ساكت وهو يطالع البحيرة الا قدامهم ويده ملفوفة بشاش ابيض

عادل قرب من وراه وحط يده على ظهر الكرسي
- كيف يدك ؟

راجس ما جاوب عليه هو اكتفى انو يرفعها ويوضح الشاش الا فيها

عادل تنهد وهو يجلس في الكرسي الا جنب راجس
- ضربها لو ما تدري

راجس لف وجهه ناحيت عادل الا هز راسه
- انس ضربها لما عرف انها اذتك ..

راجس نزل عيونه
- عشان كذا انس ما ينفع يبقى معانا صح ؟

عادل هز راسه بشويش
- عشان كذا انس لازم يظل في ذاك المركز .. لانو محد يقدر يتحكم فيه

راجس ضغط على يده
- بس هو هادي ..

عادل مد يده ومسك يد راجس
- تعرف ليش في زر امان لكل مسدس ؟

راجس طالع في عادل
- عشان لا يقتل اي طفل نفسه بالغلط

عادل ابتسم
- انس ما انولد بذاك الزر .. بس .. انت تقدر تكون ذاك الزر له

راجس عقد حواجبه
- بس انت تبغى ترسله للمركز ومعد بنشوفه .. امي قالت بترميه بأي مكان بس ما تبغاه هنا

عادل هز راسه
- انس بيروح عيلة ثانية بس .. ( التفت عادل حوله ورخى صوته شوي ) محد بيعرف انو عادي نشوفه غيري انا وانت طيب ؟ .. انس هو سرنا احنا

راجس عض شفايفه
- يعني ما ينفع اقول لرازي وراشد صح ؟

عادل مسح على راس راجس
- احنا ما بنقولهم انو انس اصلا اخوهم تتذكر ؟ .. عشان انس ما ينفع يعيش معاهم ولو عرفوا بيزعلوا انو ليش هو هنا معاك وهما لا .. هل تبغى راشد ورازي يزعلوا ويكرهوك راجس ؟

راجس هز راسه بلأ وعادل حط يده على كتف راجس
- انس لازم محد يعرف عنه .. عشانهم حيكرهوك انت راجس .. بس انت لازم تكون دايما بالنص .. بينهم وبين انس .. عشان انس لا يخسر نفسه ويصير زي المسدس الا بدون زر حماية .. فاهمني ؟

راجس ألتفت للبيت لما سمع صوت صراخ .. انس كان يقاومهم وهو يزعق .. رغم انو دوبهم اعطوه ابرة مهدئة .. ورغم كذا يده ظلت ممدودة ناحيت راجس ..

راجس ترك عادل وجري ناحيت انس بس .. راجس كان صغير .. والمسافة ما كانت بسيطة بين البحيرة الا كان قدامها وبين البيت والمواقف الا فيها سيارة المركز

راجس طاح وهو يجري وانس عض الا كان شايله ونط من يده وجري ناحيت راجس .. المهدأ جالس يثقل حركته بس هو ما بيشوف اخوه طايح على الارض بدون ما يروحله .. ما بيتركه كذا

لما وصل لراجس هو مسح خده .. عيون راجس حمرا .. بس هو انتقمله .. هو ضرب امهم .. هيا الا عورت راجس وكان المفروض تموت .. بس لو ماتت راجس بيبكي أكثر .. وهو ما يبغاه يبكي ..