راجس

63

مرهف كان واقف قدام المرايا .. طالع في اثر الجرح الا ناحيت رقبته .. ما بقي الا شي بسيط ..

اخذ نفس عميق قبل ما يسحب البودرة يحطها فوق الاثر .. يكره انو ما ينفع يشيله .. كلم كذا دكتور تجميل بس كلهم قالوا موقع الاثر قريب من عروق الرقبة فما ينفع يشيل بعمليه ..

كشر وهو يلتفت ويسحب البلوزة يلبسها .. يكره انو ذا الاثر مخرب جسمه .. كل شي فيه مثالي .. لازم كل شي فيه يكون مثالي ..

تحرك للسرير وتمدد فوقه وسحب المخدة يحطها تحت راسه وهو متمدد في وسط السرير .. رفع جواله ودخل الانستقرام .. شاف سياف منزل ستوري بس طنشه .. هو دحين مو هدفه ..

نواف حسابه مقفل ورسله طلب اضافة بس هو ما قبله للان .. يمكن ما يستعمل الانستقرام كثير ؟ .. يبغاله يطلب سنابه بعدين

طالع بحساب رازي ومافي شي جديد .. لوى شفايفه وقلب عيونه ودخل على حساب راجس .. كان منزل صورة لجواز السف في المطار ومعاها تذكرة مو واضح منها الا اسم المطارين

صور مرهف الشاشة وكبرها عشان يقرأ اسم المطار الثاني .. بعدها رفع حاجبه .. راجس طالع الرياض ؟! ..

دق قلبه ورجع لستوريات سياف ودخل يشوفها وكان هو كمان مصور مطار جدة ..

ابتسم مرهف بسخرية .. كان يترجاه يطلع معاه وما يطلع بس دحين وعشان الزفت الجديد هو عادي يطلع ويسافر ! .. بعدها يجيه بكل قواية عين يقوله انا حبيتك .. كشر وبعد الجوال عنه وهو يدفن راسه بالمخدة ..

المفروض ما يزعل .. سياف ما يستاهل يزعل عليه .. محد يستاهل تزعل عليه .. كلهم عابرين .. كلهم مجرد وسائل عشان توصل للمكان او الشي الا انت تبغاه .. لا تتعلق في احد .. لا تحب احد .. استغل الا حولك وبس .. لا تسمح لقلبك يدق عشان لا تنهار وتصير غبي .. لا تغلط اغلاط غيرك لانك تدري .. محد بيدفع ثمن اغلاطك غيرك ..

⚜️⚜️⚜️⚜️⚜️⚜️

سند عقد حواجبه يطالع جولان .. هو تقريبا متوتر وعلى اعصابه من فترة وسند مو فاهم ايش في

مد يده ومسك يد جولان الا ابتسم وهو يمسك يده

الشغالة دخلت وهيا معاها ٣ صحون حلا ووزعتها قدامهم .. دق قلب جولان بالقوة من صحن سند وبسرعة سحبه منه

سند عقد حواجبه
- ليش ؟!

جولان دف صحنه ناحيت سند بس .. ايش لو الشغالة غلطت وحطت الحبوب في الصحون الثلاثة ؟ ..

سحب صحن جدته كمان وهيا استغربت منه وسند سحب وحدة من الصحون بس جولان رجع سحبها وطاحت الصحون من يده !

ما انكسر شي بس الحلا كان على الارض وهو كان يطالعه .. ما يبغى يلعب في الاكل .. بس ما يبغى يخاطر .. ما يبغى اي احد يتأذى من افكار ثامر .. مو قبل ما يفهم ايش يبغى يسوي !