راجس

28

سياف جلس على الطاولة في المقهى وهو يشوف الناس تمشي حولينه وهو يشرب كوبه بشويش

بقي على الجلسة نص ساعة .. بيدخل مع راجس جلسته الاولى عشان القضية .. هو يدري انو القضية بتاخذ وقت طويل لان اهل عادل مو متنازلين وكل مالهم يزدوا ادلة على قضيتهم سواء كانت حقيقية او مزيفة .. كأنهم يضربوا بكل جدار حولهم ينتظروا الخلاص من اي ناحية

رفع راسه يطالع راجس الا دخل من باب المقهى .. لأول نرة يشوفه بالثوب وواضح انو ما يعرف يلبس الشماخ ابدا لانو كان حاطه بيده بدال ما يكون لابسه ! ..  ضحك على شكله الا واضح انو اخوانه زبطوه قبل موعد الجلسة

راجس تحرك ناحيت سياف وجلس قدامه بهدوء بدون ما يسلم .. وواضح القلق بعيونه..

سياف مد الكوب لراجس
- اهدأ

راجس هز راسه بهدوء وهو ياخذ نفس عميق فكمل سياف كلامه
- جلست اليوم مهي مهمة .. هيا زي التعريف عن ايش القضية وايش الادلة الا عندهم وكذا .. فالامر ما يخوف ولا لازم تشيل همه

راجس بلل شفايفه وهو يطالع بالقهوة
- يعني اليوم بنعرف كل الحجج والهبل الا هما رافعينه ضدي ؟

سياف ابتسم
- بالزبط .. كل الهبل .. ركز على انو كل الا بيرفعوا ضدك هبل .. انت الا عشت مع عادل طول عمرك وانت الا كان يعاملك كأنك ولده .. ذولاك أهله صح .. بس في فترة بعمرنا بذات لما نتغرب او لما ننشغل ببناء عيلة ثانية فأحنا نفقد ذيك الصلة القوية مع الاهل .. وذا مو غلط .. راجس محد يعرف عادل في اخر سنينه قدك .. ومحد يستاهل ذي التركه غيرك

راجس رفع عيون يطالع سياف
- انا ما ابغى ورثه .. انا ابغى اخذ اغراضي بس .. انا كمان بنيتلي حياة .. ليا حساب كنت ادخر فيه طوال حياتي بس ما كنت اقدر اخليه منفصل عن عادل لانو المسؤول عني .. انا ابغى الحاجات الا اشتريتها لنفسي ..

سياف اخذ نفس عميق
- بتسترجعه .. بس ما ينفع تسكتلهم على ذي القضية .. راجس لو ما بتاخذ شي من الورث فأنت بتتعب نفسك على الفاضي بالمحاكم .. روح سلمهم كل شي وارجع ابني نفسك من الصفر لو ما تبغى تخوض التجربة كاملة .. عادل حطلك ثلث تركته وهو الحد المسموح قانونيا لك بما انك منت ولده

راجس رفع كوب القهوة يشربه وهو يحاول يهدي اعصابه ..

⚜️⚜️⚜️⚜️⚜️⚜️

على الجانب الثاني جلس رازي بالسيارة وهو يطالع الجوال .. راجس قالهم انو وصل الكافيه الا قدام المحكمة .. بيدخل مع سياف وللاسف راشد ما بيكون معاه اليوم

نواف مسك يد رازي وشد عليها
- بيكون بخير .. انت بنفسك قلت انو بيد محامي كويس

رازي طالع بنواف
- ادري بس .. فكرت انو اخوي الصغير بالمحكمة عشان قضية مهي هينة .. راجس هادي وما يسبب مشاكل .. اغلب الوقت يعني ..